Əvvəlcə aloyenin insan orqanizminə zərərləri və əks göstərişləri ilə tanış olaq. Çünki bu əfsanəvi və min illərdir tanınmış olan bitkinin fitoterapevt və həkim məsləhəti olmadan istifadəsi təhlükə yarada bilər.
Əgər pasiyentdə qanayan hemorroy xəstəliyi varsa aloye ziyan verə bilər, əsasən də çox isti və soyuq havalarda. Avi-senna/İbn Sina da öz zamanında saburun (aloyenin) soyuq havalarda istifadəsinin təhlükəli olmasını söyləmişdi. Ümumiyyətlə isə, aloye mədə-bağırsaq sisteminin, kiçik çanaq orqanlarının, böyrəklərin, sidik kisəsinin iltihabi xəstəliklərində, pielit, nefrit, qanaxma ilə müşayiət edilən qadın xəstəliklərində, gur menstruasiyalarda əks göstərişdir. Aloye bağırsaqların peristatikasını artırdığına görə yoğun bağırsaqların iltihabını yarada bilər. Eyni zamanda, ödün sekresiyasını artırdığına görə öd daşı xəstəliyində, qara ciyər xəstəliklərində, qan hayxırma ilə gedən vərəm xəstəliklərində, dekompensasiya stadiyasındaolan ürək-damar xəstəliklərində, hamiləlik zamanı, prostatitlərdə əks göstərişdir. Bəzi insanlarda yerli istifadə zamanı allergik reaksiyalar, kəskin bulyoz dermatit yarada bilər, gözlərə isə aloye şirəsi damızdırmaq qəti qadağandır. Əsasən ev şəraitində özbaşına müalicə məqsədilə aloyenin inyeksiyasından və buruna aloye şirəsinin damızdırılmasından sonra anafilaktik şok yaranması belə həkimlərin praktikasında rast gəlinib. Mübahisəli məsələ isə aloyenin onkoloji xəstəliklərdə istifadəsidir. Belə ki, N.Danikov tövsiyyə edir ki, süd vəzi, uşaqlıq, mədə, böyrək, qara ciyər xərçəngi zamanı xəstə günü aloye preparatı qəbulu ilə başlasın. Digər klinisistlər isə yuxarıda sadalanan xəstəliklərdə aloyenin qəbulunun əks göstəriş olmasını bildirir. Səbəb olaraq isə aloyenin güclü biostimulyator olmasını və onun qanaxma, şişlərin sürətlə böyüməsinə və xəstəliyin tez yayılmasına təkan verməsini söyləyir. Ümumiyyətlə isə, 40 yaşından yuxarı olanlarda aloyenin istifadəsi arzuedilməzdir.

Müəllif: Firəngiz Rüstəmova
"TƏBABƏT VƏ MİFOLOGİYA: GÖRÜNƏN VƏ GÖRÜNMƏYƏN ƏLAQƏLƏR" kitabından