Azyaşlılar adətən ilk 6 aylarında yavaş-yavaş sözləri hecalamağa; 12-ci aylarından etibarən sözləri deməyə; 18-ci aydan sonra isə artıq fikirlərini sərbəst ifadə etməyə başlayırlar (burada yaş, cinsiyyət və fərdi fərqlər nəzərə alınmalıdır).

Fərqli xəstəlik və ya problem nəticəsində bu proses gecikə və ya dayana bilir. Nitqinin ləngiməsinin psixi səbəblərinə ailədaxili münasibət problemləri, azyaşlıya yetəri qədər qayğı və sevginin hiss etdirilməməsi, yaşıdları ilə yetəri qədər vaxt keçirməməsi, uşağın dinlənilməməsi və s. aiddir.

Övladınızda nitq geriliyinin olub-olmadığını necə müəyyən etməyiniz üçün bəzi narahatlıqları sadalamışıq: danışığı anlaşılmamaq, yeni kəlimələri öyrənməmək, nitqi yaşından gözlənən səviyyədə olmamaq (sadəcə 2-4 ay fərq olması normaldır), istəklərini əl hərəkətləri ilə izah etmək və s.

Unutmayaq ki, uşaqların psixo-sosial inkişaf dövrünün nizamlı, sosial münasibətlərinin normal olması və bu dövrdə lazımi səviyyədə inkişafı üçün danışması önəmlidir. Övladınızda sadalanan problemlərin bir neçəsini eyni zamanda müşahidə etmisinizsə, mütəxəssisdən yardım almaqdan çəkinməyin.

Fərqindəliklə!