Oktyabrın 24-də Rusiya Federasiyasının Prezidenti Vladimir Putin Azərbaycan Respublikasının Prezidenti İlham Əliyevə zəng edib.

Teleqraf xəbər verir ki, Azərbaycan Prezidentinin Mətbuat Xidməti məlumat yayıb.

Azərbaycan və Rusiya prezidentləri Düşənbədə MDB Dövlət Başçıları Şurasının iclası çərçivəsində oktyabrın 9-da keçirdikləri görüşün davamı olaraq ikitərəfli gündəliyin bir sıra aktual məsələlərini müzakirə ediblər.

Dövlət başçıları iqtisadi-ticari əlaqələrin daha da inkişaf etdirilməsinə, həmçinin enerji və nəqliyyat-logistika sahələrində birgə layihələrin həyata keçirilməsinə qarşılıqlı maraqlarını təsdiqləyiblər.

Telefon söhbəti zamanı regional əməkdaşlığın bəzi aspektlərinə və beynəlxalq vəziyyətə toxunulub.

Müxtəlif səviyyələrdə təmasların davam etdirilməsi barədə razılıq əldə olunub

***

Rusiya Prezidenti Vladimir Putinlə Azərbaycan Prezidenti İlham Əliyev arasında telefon danışığı olub.

Teleqraf xəbər verir ki, bu barədə Kremlin mətbuat xidməti məlumat yayıb.

“Rusiya Prezidenti Vladimir Putinlə Azərbaycan Prezidenti İlham Əliyev arasında telefon danışığı olub. Bu, oktyabrın 9-da Düşənbədə MDB sammitində baş tutan söhbətdən sonra olub”, - məlumatda deyilir.

Əliyev və Putin beynəlxalq və regional vəziyyəti, eləcə də regional əməkdaşlığın bir sıra aspektlərini müzakirə ediblər. Kremlin açıqlamasına görə, dövlət başçıları müxtəlif səviyyələrdə təmasları davam etdirmək barədə razılığa gəliblər.

Telefon danışığı zamanı Rusiya prezidenti ilə azərbaycanlı həmkarı da ticari-iqtisadi əlaqələrin və müxtəlif sahələrdə birgə layihələrin daha da inkişaf etdirilməsinə sadiq olduqlarını təsdiqləyiblər.

“İkitərəfli gündəliyin bir sıra aktual məsələləri müzakirə olunub”, - məlumatda qeyd edilir.