ABŞ-ın yaxın günlərdə Venesuelada narkotik kartellərinə qarşı quru əməliyyatlarına başlamağa hazırlaşdığı açıqlanıb. Prezident Donald Tramp bildirib ki, ABŞ Konqresi bu əməliyyatlara qarşı çıxmayacaq.

Eyni zamanda, Tramp mediada “B-1” bombardmançılarının Venesuela sərhədinə göndərilməsi ilə bağlı yayılan məlumatları təkzib edib və xəbərlərin həqiqətə uyğun olmadığını vurğulayıb.

Bu əməliyyatın pərdəarxasında nə dayanır? ABŞ Venesuelada qalıcı hərbi mövcudluq yarada bilərmi?

Globalinfo.az-a danışan politoloq Elşad Həsənov deyib ki, Trampın əsas məqsədi Venesuela Prezidenti Nikolas Maduronun hakimiyyətdən getməsinə nail olmaqdır:

“ABŞ Maduronu və onun komandasında olanları ölkəyə narkotik daşımaqda günahlandırır. Vaşinqton həmçinin buna qarşı ciddi əməliyyatlara başlayacağını da bəyan edib. ABŞ-a məxsus “B-52” və “F-35” tipli qırıcı təyyarələr artıq Venesuela yaxınlığında müşahidə olunub. Tramp həmin ərazidə ABŞ gəmilərinə atəş açılacağı təqdirdə dərhal cavab zərbəsi endirilməsi barədə göstəriş verib.

Ağ Ev rəhbərinin açıq məqsədi Maduronun hakimiyyətdən uzaqlaşdırılmasıdır. Venesuela prezidenti seçkilərdə uduzmasına baxmayaraq, hakimiyyəti təhvil vermədi. Bununla yanaşı, Kolumbiya prezidentinin də postdan getməsi Trampın hədəflərindən biridir. O, Kolumbiyanın da ABŞ-a narkotik tədarükündə rol oynadığını iddia edərək yeni cəbhə açır”.

Politoloqun sözlərinə görə, ABŞ-ın Venesuelanı işğal edib orada hərbi baza yaratmaq planı yoxdur:

“Vaşinqtonun məqsədi narkotik ticarəti ilə məşğul olan şəbəkələri zərərsizləşdirmək və regionda özünə loyal liderlərin hakimiyyətdə qalmasını təmin etməkdir. Bu, güclü dövlətlərin liderlərinə xas yanaşmadır. İstənilir ki, hər bir ölkədə ABŞ-ı dəstəkləyən, onunla əməkdaşlığa açıq prezidentlər olsun”.