***
Həkimin qəbuluna iki xanım gəldi. Həyat anamnezi ilə tanışlıq zamanı hamilə çox qayğılı, fikirli olduğu üçün suallara ləng cavab verirdi, bir-iki dəfə təkrarladırdı. Anasının da söhbətə qarışması ilə məlum oldu ki, 7 aya yaxındır ərdədir, birinci hamiləlikdir, əri öz xalası oğludur, aralarında 12 yaş fərq var, orta yaşlı xanım isə anasıdır və qızını hamiləlik qeydiyyatına gətirib.Yazı işi və analizlərin götürülməsi bitdikdən sonra hamilənin anası xahiş etdi ki, bizə bir dənə də qızımın həqiqətən hamilə oması haqqında arayış verin.
-Həkim: zəhmət olmasa deyərdiniz arayış hansı idarəyə veriləcək?
-Hamilənin anası:məhkəməyə...
- Əslində elə arayışlar sorğu əsasında verilir... amma ciddi problemmi var...nə məsələdir?
-Hamilənin anası: boşanma ərizəsi vermişik həkim...
-Həkim: bəs bu işlər necə olacaq...uşaq doğulmamış atasız qalacaq...qızınızın taleyi...bəlkə bir az düşünəsiniz?
-Yox daha o söhbətlərdən keçib, hər şeyi göz altına almışıq dedi və aram-aram danışmağa başladı...bacımın oğlu illərdir Rusiyada idi...
Gəlmirdi vətənə...bir il əvvəl gəldi burda da içi mən qarışıq başladıq məsləhət verməyə ki, bəs evlən, yaşın ötür, neçə illərdir çöllərdəsən...daha səni buraxmayacağıq...yəni qohum-əqrəba hamı qonaq çağırdı, hərə bir tərəfdən düşdük əl-ayağına ki, evlən qal burda...daha qayıtma! 1-2 ay sonra bacım dedi ki, bəs sənin qızın həm sakitdi, həm ağıllıdı, evdardı, yaraşıqlıdı bəlkə bunları evləndirək mən də yazığam daha fikir çəkmiyim. Oğlum gedənnən yuxu nədir bilmirəm...narahat oluram... mən də razılıq verdim...beləcə 10-15 günün içərisində xətircəmlik də, nişan da, toy da oldu. Toydan bir az sonra dedi ki, bəs gedim orda dükanım filan var onu satım, bəzi yarımçıq işlərimi görüm gəlim. Gedənnən sonra zəng etmədi, zənglərimizə cavab vermədi...axırda bir gün görüntülü zəng gəldi bacıoğludan...amma tək deyildi...yanında bir qadın iki də uşaq var idi. Qadın rus dilində danışırdı...bizi başa saldı ki, xaiş edirəm mənim uşaqlarımın atasını rahat buraxın və mənim ailəmi dağıtmayın...
***
İllərdir tanıdığım, əsasən xalaoğlu-xalaqızı evliliklərinə üstünlük verən, ana tərəfdən genetik olaraq qız övladlarına fibromioma ötürülən ailənin yeni cütlüyü müayinəyə gəldi. Anamnezdən məlum oldu ki, 3 aya yaxındır evlidirlər. Hamiləlik ehtimalı yoxdur. Amma qarın hissə köbəkdən 3k/b yuxarıya qədər bərkdir, hər nə yesə özündə ağırlıq hiss etməsi və sair kimi şikayətləri var. Qərarlaşdıq ki, qarının kiçik çanaqdan başlayaraq palpasiyada bərk olmasını nəzərə alaraq, pasiyent USM-dən keçsin ilkin diaqnozu təxminləşdirək və ona əsasən hərəkət edək.
Usm-n nəticəsi təxminən belə oldu (ölçüləri və strukturu dəqiq göstərməyə ehtiyac duyulmur): çox böyük, giqant ölçüdə fibromatoz düyün...
Pasiyentlə bərabər həkim də çox məyus oldu...Bu dəfə təbiət qəddarlıq etmişdi...(Doğrudur pasiyentdə orqanı saxlamaq şərti ilə cərrahi əməliyyat olundu, illərdir müalicələr və müayinələr davam edir. Bir dəfə də sünii mayalanma oldu, əfsus ki, baş tutmadı. Amma yenə ümidimizi itirməməliyik təkrar s/m olunmalıdır)
***
Mənbələrə görə: Uşaqlığın miomasını genetik olaraq nəsildən-nəsilə ötürülmə ehtimalı haqqında bəzi elmi məlumatlar: əgər ailədə və yaxın qohumlarda uşaqlığın mioması varsa qohum evliliyi zamanı şiş 5-10 il daha erkən yaranır, 20-25 yaşlarında belə yarana bilir.


Ardı var...