"Cəhənnəmdə yer hazırla, gəlirəm, Allah" - Arzu GÖYTÜRK


Götür ordan ikimizi, qayıt gəl,
başın olsun dizlərimin üstündə.
Yaşamağa sən düşünmə ev-eşik,
yuva quraq gözlərimin üstündə...

Su istəsən dodağına toxunum,
su dolusu ovcum olsun fincanın.
Bu dünyada ol ən doğmam,yaxınım!
kim arzular səni belə, sən canın?..

Sinən yastıq, qolun olsun yorğanım,
barmaqları saçlarıma daraq, gəl.
Sən olmasan dünyam nurun itirər,
a gecəmə, gündüzümə çıraq, gəl..

Od nəfəsin meh çiləsin üzümə,
həyat eşqim gözlərindən güc alsın.
Ömrüm-günüm, bizim dəli sevgimiz,
bizim ilə bir yastıqda qocalsın...



**********************

"And iç, inanım" dedin,
vallah, dəlim, sevirəm!
Sənə sən öl! - demirəm,
özüm ölüm sevirəm!

Qəzəbli baxışına,
nətəhər dözüm axı?
Mənim səndən başqasın,
görməyir gözüm axı...

Bəlkə də, səmimiyəm,
bəlkə də, safam ancaq
Sənin olan ürəyi,
eyləmərəm oyuncaq!

"And iç, inanım" - dedin,
vallah, dəlim, sevirəm!
Sənə sən öl! - demirəm,
özüm ölüm sevirəm!


*******************

Mən üsyankar bəndən idim,
bilirəm Allah, bilirəm...
Cəhənnəmdə yer hazırla,
gəlirəm Allah, gəlirəm...

Qəlb vermişdin dağ qaytardım,
qara saçı ağ qaytardım,
De, nəyini sağ qaytardım?
ölürəm Allah, ölürəm...

Düz gəlmədim bu aləmlə,
"həyat adlı əqlikəmlə",
Ömrümü verdiyin qəmlə,
bölürəm Allah, bölürəm...

Məzlum düşəndə çətinə,
üsyan etdim zillətinə,
Mən sənin "ədalətinə",
gülürəm Allah, gülürəm...

Mən üsyankar bəndən idim,
bilirəm Allah, bilirəm...
Cəhənnəmdə yer hazırla,
gəlirəm Allah, gəlirəm...