“Bundan sonra Ermənistan ordusu yalnız xəndəklərdə oturmayacaq – hər gün potensial düşmən üçün daha təsirli, güclü və gözlənilməz olacaq”. KONKRET.az erməni mediasına istinadən xəbər verir ki, bu barədə Ermənistanın müdafiə naziri David Tonoyanın təbrik mesajında ​​deyilir.

Tonoyan ölkənin hərbi heyətinə göndərdiyi mesajda onları qarşıdan gələn Yeni il və Milad münasibətilə təbrik etməklə yanaşı, Ermənistan Silahlı Qüvvələrinin gələcək inkişafına dair fikirlərini bölüşüb. Müdafiə naziri rəhbərlik etdiyi sahənin nailiyyətləri barədə danışıb. Boş-boş yalançı inkişafdan danışan nazir hələ bu günə qədər vətəndaşlaın orduya inamsızlığından bəhs etməyib. Lakin Tonoyan özünün xüsusi bildiyi bir məqama diqqət yetirib: “Bəşəriyyət tarixi göstərir ki, əsas düsturu xəndək müdafiəsi olan hər hansı bir ordu məğlubiyyətə məhkumdur. Buna görə, aşağıdakı suallara cavab axtararkən düşüncəmizi yenidən nəzərdən keçirməliyik: “nə etməli”, “necə ediləcək”. Bundan sonrakı hərəkətlərimiz bu sualların cavabından asılıdır”.

Onun sözlərinə görə, “Ermənistanın hərbi rəhbərliyi bir dilemma ilə üzləşib: orduya xəndək müdafiəsi bacarıqlarını aşılamaq və ya onlardan düşmənin ərazisində tapşırıqları parlaq şəkildə yerinə yetirməyə hazır olan həlledici döyüşçülər hazırlamaq”.

Silahlar sahəsində də oxşar suallar ortaya çıxıb – Ermənistanın yalnız müdafiə sistemlərinə ehtiyacı var və ya “düşməni öz ərazisində diz çəkdürəcək” müasir və müxtəlif vasitələrə ehtiyac duyulur?.

Müdafiə naziri əmin olduğunu bildirib ki, bundan sonra Ermənistan ordusu yalnız xəndəklərdə oturmayacaq – hər gün daha çox döyüşə hazır, güclü və potensial düşmən üçün gözlənilməz hala gələcək. “Silahlarımız daha müxtəlif, müasir və ölümcül hala gətirilən bir orduyuq. Döyüşçüləri mükəmməl təhsil almış, dövlətin daim qayğısı altında olan və ən vacib missiyanı yerinə yetirdiklərini qəti şəkildə bilən bir orduyuq”, – deyə Tonoyan ölkənin hərbi heyətinə müraciətində vurğulayıb.

“Vaxt gələcək qılınc qalxan və qılıncın əbədi mübarizəsində qalib gələcək və bu həqiqət bir daha təsdiqlənəcək”, Müdafiə Nazirliyinin başçısı fikirlərini belə davam etdirib: “Gəlin fəal olaq – nəinki düşmənlə mübarizədə, həm də gündəlik həyatda. Passivlik, sifarişləri daim gözləmək kökündən qəbuledilməz hala gətirilməlidir”.