Son zamanlar "Tik Tok” sosial şəbəkəsindən istifadə edənlərin sayı durmadan artır. Lakin bu qısa video paylaşım şəbəkəsi haqqında fikirlər müsbət deyil.

Hazırda ölkəmizdə "Tik Tok” platformasından istifadə edən kifayət qədər istifadəçi var. Onlar arasında xüsusilə gənclər çoxluq təşkil edir. Yeniyetmə qızlar narkotik maddələrin təbliğ edildiyi mahnıların sədaları altında rəqs edib, qısa videolar çəkirlər. Şəbəkədə açıq-saçıq video görüntülərin də yayılması istisna olunmur.

Özündə heç bir intellektuallığı əks etdirməyən bu şəbəkə heç də yaxşı hadisələrdən xəbər vermir. Gənc oğlanların və qızların biədəb video paylaşması neqativ halların yaşanacağından xəbər verir. Bəs, bu cür xoşagəlməz mənzərini aradan qaldırmaq üçün hansı tədbirlər görülə bilər?

Sualımızı cavablandıran internet-media eksperti Səbuhi Abbasov "Sherg.az”a açıqlamasında "Tik Tok” şəbəkəsinin böyük fəsadları olduğunu bildirdi.

Ekspertin sözlərinə görə, Feysbuk və İnstaqramdan sonra təxminən 100-ə yaxın sosial şəbəkə statusuna malik mobil proqramlar yaradıldı:

"Bu proqramların bir çoxu müəyyən sahələr üzrə ixtisaslaşıb. Məsələn, Tvitter platforması sırf ictimai-siyasi proseslərin işıqlandırılmasına həsr olunub. İnstaqram daha çox əyləncə və şou-biznes yönümündə ixtisaslaşdı. Feysbuk isə müxtəlif prosesləri əks etdirən platformadır. Bu şəbəkələr yaranandan sonra "daha nə kimi yenilik gətirə bilərik?” deyə müxtəlif və ağlasığmaz metdolardan istifadə etməyə başlayırıq. Əslində "Tik Tok” sosial şəbəkələr xaricində özünün yenilikləri ilə seçilən platformadır.

Çünki burada insanların birbaşa həyat fəaliyyətinə aid olan video görüntülərin yerləşdirilməsi ehtiva edilir. Təbii ki, bu da birmənalı şəkildə insanların şəxsi həyatının qısa zaman ərzində müəyyən auditoriyaya çatdırılması deməkdir. Burada çox ciddi məqamlar var. Məsələn "Tik Tok”un özündə qeydiyyatdan keçəndən sonra həmin proqramın müxətlif şərtləri var. Yaxşı olar ki, istifadəçilər şərtlərlə tanış olsunlar. Çünki həmin şərtlərdə müəyyən məsuliyyətlər qeyd olunub. Məsuliyyətlərin demək olar ki, mühüm hissəsi məhz qeydiyyatdan keçən istifadəçilərin üzərinə düşür”.

S.Abbasov cəmiyyətimizin İKT yenilikləri ilə ayaqlaşmaqda çətinlik çəkdiyini qeyd edib:

"Çünki İKT çox sürətlə inkişaf edir. Bu inkişafın xeyri, fəsadları, ölkədəki rolu və.s ilə bağlı innovativ qiymətləndirmə zəif aparıldığına görə, bizim kimi cəmiyyətlər daha çox fəsadlarla qarşılaşır. "Tik Tok” şəbəkəsinin də fəsadları çox böyükdür. Düzdür, Azərbaycan demokratiya və azad internet yolunu seçib. Amma bizim dədə-babalarımızdan gələn mental dəyərlərimiz var. Müsəlman ölkəsi olduğumuz üçün şəxsi həyatımızla bağlı bir çox intim məqamların verilməsi cəmiyyətdə xoş qarşılanmır.

"Tik Tok” platformasında avropalı istifadəçinin paylaşcağı videonu bizimkilərin paylaşması düzgün deyil. Təəssüf ki, belə videolara rast gəlinir. İnsanlar müxtəlif şıltaqlıqlarla çalışırlar ki, özlərini hansısa auditoriyaya nümayiş etdirsinlər.

Düşünmürlər ki, bunların sonrakı fəsadları onlar üçün ciddi ola bilər. Yəni, ailəli insanların ailəsi dağıla bilər, azyaşlı qızın video paylaşması onun gələcək həyatında problem yarada bilər. Feysbukda, Tvitterdə hər hansı bir formada maddi və mənəvi baxımından müsbət çalarlar tapa bilərik. İnsanlar bu şəbəkələrlər özünü, biznesini inkişaf etdirir.

Ancaq "Tik Tok” kimi sosial şəbəkələrin ümumiyyətlə, heç bir faydası yoxdur. Bu platforma sadəcə, insanları çılğınlığa çağıran bir sosial şəbəkədir. Hesab edirəm ki, belə hallarda əsas yük valideynlərin və orta məktəblərin üzərinə düşür. Valideynlər azyaşlıları smartfonlardan uzaq tutmalıdırlar. Ümumiyyətlə, bəzi sosial şəbəkələri ailəmizdən uzaq tutmağa məcburuq. Məsələnin ciddiliyini dərk etmiriksə, övladlarımızla bağlı xoşagəlməz hallara rast gələcəyik”.