Noyabrın 8-də Şuşanın azad edilməsi Azərbaycan hərb tarixində dönüş nöqtəsi kimi yadda qaldı. Bu zəfər Qarabağ müharibəsində üstünlüyün əldə edilməsinə şərait yaratdı.

Şuşanın azad edilməsində əsas uğur açarımız nə idi?

Globalinfo.az-a danışan hərbi ekspert Ədalət Verdiyev deyib ki, 8 noyabr 44 günlük müharibənin ən unikal hərbi əməliyyatı kimi tarixə düşüb:

“Şübhəsiz ki, burada Azərbaycan əsgərinin vətən sevgisi əsas təsiredici qüvvə idi. Ölkəmizin işğal altında olan hər bir yaşayış məntəqəsinin azad edilməsi böyük əhəmiyyət daşıyırdı. Lakin Şuşa əməliyyatı xüsusi strateji və mənəvi önəmə malik idi. Məhz bundan sonra Ermənistan kapitulyasiya aktını imzalamağa məcbur oldu. Bu gün dünyanın bir çox hərbi elmi-tədqiqat mərkəzləri Şuşa əməliyyatının həyata keçirilmə təcrübəsini öyrənməyə çalışır, bir sıra ölkələrin hərbi təhsil müəssisələrində nümunə kimi tədris olunur”.

Ekspert qeyd edib ki, Şuşa döyüşünə qədər dünyada heç bir ordu, hətta təlim şəraitində belə bu tip tapşırıqları yerinə yetirməyib:

“Çünki belə bir əməliyyatın insan imkanları daxilində mümkün olacağına inanılmırdı. Lakin Azərbaycan Ordusu bu unikal əməliyyatı uğurla həyata keçirməklə öz adını dünya hərb tarixinə qızıl hərflərlə yazdırdı. Hərb tarixində bu qədər mürəkkəb coğrafi mövqedə, yəni yüksək qayalıq üzərində yerləşən qala şəhərin azad edilməsi kimi bir nümunə mövcud deyildi. Şuşada yerləşən erməni silahlı birləşmələrinin sayı şəhəri azad etməyə cəlb olunan Azərbaycan xüsusi təyinatlı qüvvələrinin sayından yeddi dəfə çox idi. Bu, əsas çətinliyimiz idi. Bundan başqa, düşmən şəhəri qaya üzərində yerləşən möhkəm istehkamdan müdafiə edir, zirehli texnika, artilleriya və tank əleyhinə vasitələrdən istifadə edirdi. Belə şəraitdə, yəni yeddi dəfə üstün qüvvə və ağır texnika ilə müdafiə olunan bir şəhəri ordumuz yalnız yüngül atıcı silahlarla və məhdud sayda tank əleyhinə vasitələrlə azad etməyə nail oldu. Bu, hərb tarixində ilk oldu”.