Havay adalarında amerikalı əsgər dünyanın ən fəal vulkanlarından birinə düşərək ağır yaralanıb.

BBC-nin məlumatına görə bu haqda Havay Vulkanları Milli Parkının (Hawaii Volcanoes National Park) rəsmisi məlumat yayıb.

Onu xilas etmiş reyncerlərin dediyinə görə, 32 yaşlı hərbçi, Kileauea vulkanını yaxından seyr etmək istəyən zaman təhlükəsizlik məqsədilə qoyulmuş dəmir çəpəri aşıb. Həddindən artıq yaxınlaşdığından ayağının altındakı torpaq sürüşüb və nəticədə 21 metr dərinlikdə vulkan çıxıntısının kənarına düşüb.

Bəxti onda gətirib ki, vulkanın kraterinə yuvarlanmayıb. Əks təqdirdə oradan heç cür sağ çıxa bilməzdi.

Xilasedicilər onu kəndirlərin köməyi ilə yuxarı qaldırıb, sonradan zərərçəkən Müdafiə Nazirliyinin helikopteri ilə Hilo Medical Center xəstəxanasına təxliyyə olunub. Reanimasiyada olan hərbçinin vəziyyəti ağır olsa da sabitdir.