İsrailin Baş naziri Benyamin Netanyahu ölkəsinin Yaxın Şərqdəki mühüm dövlətlərlə birlikdə İran təhdidinə qarşı yeni ittifaqlar qurduğunu bildirib. O, bu barədə yaxın zamanda daha ətraflı məlumat veriləcəyini söyləyib.

Netanyahunun anonsunu verdiyi bu ittifaq hansı ölkələri əhatə edə bilər?

Globalinfo.az-a danışan politoloq Zeynal Əmrəliyev deyib ki, Netanyahunun nəzərdə tutduğu ölkələr böyük ehtimalla Körfəz dövlətləridir:

“Məlum olduğu kimi, İran müharibə başlayandan sonra ABŞ və İsrailə cavab olaraq Küveyt, Qətər, BƏƏ, Bəhreyn və Omana zərbələr endirdi. Onu da qeyd edim ki, müharibədən əvvəl də adını çəkdiyim bu ölkələrin Tehran hökuməti ilə ciddi problemləri mövcud idi. Məsələn, Bəhreynlə İran arasında uzun müddətdir davam edən gərginlik var. Çünki daha əvvəl İranın dəstəyi ilə həmin ölkədə kralın devrilməsinə cəhd göstərilib. Bəhreyndə əhali əsasən şiə olsa da, hakim kral ailəsi sünnidir.

Tehranın BƏƏ, Küveyt və Səudiyyə Ərəbistanı ilə daha çox ideoloji mübarizəsi mövcuddur. İrandakı şiəliklə regiondakı digər dini-siyasi cərəyanlar bir-birinə zidd mövqedə dayanır. Bu da dini-ideoloji rəqabət yaradır. Ona görə də bu gün İsrail həmin ölkələri İrana qarşı bir araya gətirməyə çalışa bilər. ABŞ Prezidenti Donald Tramp da belə bir ittifaqın qurulmasını istəyib və bu, əslində yeni layihə deyil.

Belə ki, vaxtilə ata Corc Buş İraqa müdaxilə üçün belə bir koalisiya formalaşdırmaq istəyirdi. Həmin dövrdə İranla müəyyən danışıqlar aparılır və Səddam Hüseynə qarşı Tehranın da bu koalisiyaya cəlb edilməsi müzakirə olunurdu. Lakin hazırda vəziyyət fərqlidir – indi isə əksinə, İranın özünə qarşı koalisiya formalaşdırılır”.