İsrailin Baş naziri Benyamin Netanyahunun ABŞ-a səfəri ətrafında müzakirələr davam edir. Xüsusilə onun İrana qarşı NATO bənzəri təşkilat yaratmaq təklifi diqqət çəkir.

Bəzi ekspertlər hesab edir ki, onun bu təklifi ABŞ tərəfindən dəyərləndiriləcək. Lakin bu təklifi real hesab etməyən ekspertlər də var.

Yaxın Şərqdə belə bir təşkilat yaratmaq mümkündürmü? Bu təşkilatın hədəfi İran olacaq? Belə olan halda islam ölkələri İrana qarşı İsrail ilə birlikdə hərəkət edəcək?

Globalinfo.az-a danışan politoloq Tural İsmayılov deyib ki, İsrail və ABŞ müxtəlif platforma və sahələrdə əməkdaşlıq edir:

“İki ölkə münasibətləri hazırda ən üst səviyyədədir. ABŞ onsuz da İsraili müdafiə edir. Yəni bütün bunları nəzərə aldıqda Yaxın Şərqdə yeni bir təşkilatın yaranması o qədər də inandırıcı deyil.

İsrailin arzuladığı kimi bir təşkilatın yaranması ona görə mümkün deyil ki, Təl-Əviv region ölkələri ilə elə də sıx əməkdaşlığa malik deyil. Bir çox Yaxın Şərq ölkəsi İsraili düşmən kimi görür. Buna görə də bu və ya başqa formada onun olacağı bir hərbi təşkilata çətin ki, müsəlman ölkələr üzv olsun.

ABŞ bütün bunları yaxşı bilir. Ona görə də belə bir layihəni qəbul etməyəcək. ABŞ İrana qarşı olan bir ölkədir, amma İsrail kimi düşmən də deyil. ABŞ İrana qarşı İsrail ilə hazırkı əməkdaşlıqdan məmnundur, amma bunun bir növbəti mərhələyə keçməsini istəmir”.