Özbəkistan hüquq-mühafizə orqanlarının saqqallı kişilərə qarşı keçirdiyi reydlər cəmiyyətdə geniş müzakirələrə səbəb olub. Məlumata görə, paytaxtın müxtəlif ərazilərində keçirilən əməliyyatlar zamanı saqqallı kişilər ictimai yerlərdə saxlanılaraq polis bölmələrinə aparılıb və onlardan saqqallarını qırxmaq tələb olunub. Reydlər zamanı saxlanılan şəxslər arasında tanınmış özbək bloger Abdurahmon Abdurahmonov da olub. O, sosial şəbəkədə saqqalı qırxıldıqdan sonra çəkdirdiyi fotosunu paylaşaraq baş verənlər barədə açıq danışmağın çətin olduğunu bildirib.

Bu hadisə regionda fərdi azadlıqlar və dövlət tənzimləmələri ilə bağlı müzakirələri yenidən gündəmə gətirib. Bəs oxşar qaydaların Azərbaycanda tətbiqi mümkündürmü?

Globalinfo.az-a danışan deputat Ceyhun Məmmədov bildirib ki, hər bir ölkənin özünə xas normaları və qaydaları mövcuddur:

“Birinci növbədə araşdırmaq lazımdır ki, Özbəkistan hüquq-mühafizə orqanları bu addımı niyə atırlar. Yəni bu tədbir ümumi saqqal saxlayanlara aiddir, yoxsa konkret dindar şəxslərə yönəlib? Əsas məsələ prosesin hansı formada həyata keçirildiyini və kimlərə tətbiq olunduğunu müəyyənləşdirməkdir. Əslində hər kəsin şəxsi seçimidir, istəyən insan saqqal saxlaya da bilər, istəmirsə saxlamaya da. Azərbaycanda bu sahədə sərbəstlik var”.

Deputat əlavə edib ki, ölkədə getdikcə saqqal saxlayan və səliqəsiz görünən insanların sayı artır:

“Bu məsələnin həlli zor gücü ilə deyil, davamlı maarifləndirmə və təbliğat vasitəsilə mümkün ola bilər. Təəssüf ki, gənclərin bir qismi bunu edir və bu, bəzən narazılıq və narahatlıq yaradır. Lakin məcburi qaydalarla deyil, maarifləndirmə işləri ilə gəncləri daha səliqəli geyinməyə və saqqallarını nizamlı saxlamağa yönəltmək daha məqsədəuyğundur”.