Prezident İlham Əliyev Münhendə “France 24”ə müsahibəsində bildirib ki, Azərbaycan birtərəfli qaydada Ermənistana malların tranziti üzərində olan məhdudiyyətləri aradan qaldırdı.

Sitat:

“Biz həmçinin Ermənistana vacib neft məhsullarını təchiz etməyə başladıq və bununla da ticari münasibətlərimiz başladı. Beləliklə, görə bilərik ki, artıq sülhə nail olunub. Yekun sülh sazişini imzalamaq üçün müəyyən formal xarakter daşıyan məsələlər var. Lakin qeyd etdiyiniz bəyannamə ilə yanaşı, hər iki ölkənin xarici işlər naziri Vaşinqtonda sülh sazişinin mətnini də paraflayıb. Beləliklə, mənim üçün bu, artıq bitmiş işdir. Hesab edirəm ki, Ermənistanın baş naziri də mənimlə eyni fikirdədir. Biz elə indi sülh şəraitində yaşamağı öyrənirik və bu, çox yaxşı bir hissdir”

Globalinfo.az-a danışan deputat Hikmət Babaoğlu deyib ki, Azərbaycan Prezidenti müsahibəsində Ermənistanla münasibətlərdəki son vəziyyəti qiymətləndirib:

“ABŞ-da paraflanmış sülh sənədindən sonra bu günə qədər atəş səslərinin eşidilmədiyini bildirib. Bundan başqa, Prezident qeyd edib ki, de-fakto sülh mövcuddur. Hüquqi sənədlərdə də sülhə nail olmaq üçün sonuncu sənədin imzalanması məqsədilə Ermənistan Konstitusiyasında zəruri dəyişikliklərin edilməsini dilə gətirib.

Bu prosesin nə ilə yekunlaşacağı perspektivindən danışarkən Prezident deyib ki, Ermənistanın baş naziri də onunla eyni fikirdədir. Bu o deməkdir ki, sülhə gedən yolda yeganə maneəni aradan qaldırmaq üçün müəyyən əsaslar var. Çünki biz həmişə sülhə gedən yoldan danışarkən Zəngəzurdan maneəsiz hərəkət və Ermənistan Konstitusiyasında dəyişiklik məsələlərini qeyd edirdik.

Bu dəfə Prezident keçid məsələsinə toxunmadı. Bu isə onu göstərir ki, həmin keçidin təminatına dair zəmanət var. ABŞ ilə Azərbaycan arasında strateji xartiyada da bu, öz əksini tapıb. Hesab edirəm ki, Prezidentin fikirlərini əldə edilmiş şifahi razılaşmanın göstəricisi kimi də qiymətləndirmək olar. Bu, heç şübhəsiz, sülhün yaxın zamanlarda tam əldə ediləcəyi ilə bağlı qətiyyəti ifadə edir”.