Müğənni Eldəniz Məmmədovun boşanmalara görə pul cəriməsinin tətbiqi ilə bağlı təklifi ictimai müzakirələrə səbəb olub. İfaçı iddia edir ki, Türkiyədə boşanan cütlüklər dövlətə 30-40 min dollar ödəyir və bu mexanizm ailələrin qorunmasına xidmət edir. O, Azərbaycanda da analoji qaydanın tətbiqini təklif edib.

Sitat: “50 min dollar yazsınlar, onda görün hamısı necə yola gedir”.

Bəs boşanmanı cərimə yolu ilə azaltmaq mümkündürmü, yoxsa bu yanaşma ailə institutuna daha çox zərər verə bilər? Türkiyədə həqiqətən belə bir sistem mövcuddurmu? Ümumiyyətlə, dünyada buna bənzər təcrübə varmı?

Globalinfo.az-a danışan sosioloq Mail Yaqub bildirib ki, Azərbaycanda mövcud ailə qanunvericiliyi boşanmaların qarşısını almaqda effektiv deyil:

“Azərbaycanda ailə qanunvericiliyi boşanmaların, nəinki qarşısını almır, hətta müəyyən mənada buna rəvac verir. Qanun mütləq dəyişməlidir. Həm qadın, həm də kişi üçün müəyyən məhdudiyyətlər olmalıdır ki, boşanma bu qədər asan baş verməsin. Bu proses bizi sosial baxımdan ciddi problemlərə aparır. Statistikaya baxın, təkcə yanvar ayında nikahlarla müqayisədə boşanmaların nisbəti 60 faiz olub. Bu, Azərbaycan üçün çox ağır göstəricidir. Ya cərimə tətbiq edilməlidir, ya da başqa hüquqi mexanizmlər hazırlanmalıdır”.

Sosioloq hesab edir ki, boşanma prosedurları sərtləşdirilməlidir:

“Boşanma bu qədər asan olmamalıdır. Təsəvvür edin, bəzi ailələrdə kişi ailəcanlı, çalışqan, evinə bağlı olsa da, qadın boşanmaq istədiyini bildirir və üstəlik üç uşağa görə aliment tələb edir. Bəzi ailələr isə kişi xəyanətinə görə dağılır. Qanun buna bu qədər rahat imkan verməməlidir. Cütlüklərin bu qədər asan boşanmasının qarşısını almaq üçün cərimə tətbiq oluna bilər və ya alternativ hüquqi mexanizmlər düşünülməlidir. Qanunda mütləq dəyişiklik edilməlidir”.