Ötən il Azərbaycanda 17 min 191 boşanma qeydə alınıb.

Bu, indiyədək bir il ərzində qeydə alınmış ən yüksək göstəricidir və o deməkdir ki, ölkədə hər gün 47 cütlük boşanır.

Boşanmaların toplam sayı artsa da, əhalinin hər min nəfərinə düşən boşanma sayı 2019-cu ildəki göstərici ilə eyni olub – 1.7.

Bu yerdə düyünlü suallar ortaya çıxır: ildən-ilə boşananların sayının artması nə ilə əlaqədardır? Bunun qarşısını necə və hansı şəkildə almaq mümkündür?

Sosioloq Əhməd Qəşəmoğlu Publika.az-a açıqlamasında bildirib ki, proses bu cür davam edərsə, ildən-ilə boşanmaların sayı daha da artacaq. Sosioloqun fikrincə, boşanmaların əsas səbəbi cəmiyyətin son dövrdə xeyli mürəkkəbləşməsi ilə birbaşa bağlıdır:

“İnsanlar xeyli həssaslaşıb. İndiki cəmiyyət 20 il, 50 il bundan əvvəlki cəmiyyət deyil. Azərbaycanda boşanmaların sayı 2014-cü ildən artmağa başlayıb. Əgər cəmiyyət dəyişibsə, biz ailə institunu qoruyub saxlamaq üçün yeni yanaşma və metodlardan istifadə etməliyik. 10 ildir ki, bununla bağlı həyəcan təbili çalıram. Bu müddət ərzində aidiyyatı qurumlardan biri də məndən soruşmayıb ki, axı siz nə demək deyirsiniz?! Həmin qurumlar yenə də 20 il, 50 il əvvəlki metodlarla işləyir. Kompleks işlər aparılmır. Ona görə də boşanmaların qarışısının alınması istiqamətində eniş müşahidə olunmur. Eyni zamanda, elmi əsaslarla hazırlanmış texnologiyalar yoxdur. Bu problemin həllini yalnız Ailə, Qadın və Uşaq Problemləri üzrə Dövlət Komitəsindən gözləmək olmaz. Həmin qurum icraçı strukturdur. Ümumiyyətlə, ölkədə ailə institutu ilə bağlı yeni siyasət formalaşmalı, yeni yanaşmalar ortaya qoyulmalıdır. Hətta qanunvericilik sistemində də müəyyən dəyişikliklər edilməlidir. Prezident Administrasiyası bununla bağlı təşəbbüs göstərməlidir. Mən bu barədə dəfələrlə onlara təkliflər vermişəm, amma cavab yoxdur. Təəssüfedici məqamdır”.

Əhməd Qəşəmoğlu bildirib ki, ailə institutunun əzəli və əbədi funksiyaları var:

“Həmin funksiyalar min il əvvəl də mövcud idi, 20 il əvvəl də. Biz düşünməliyik ki, cəmiyyət dəyişir, deməli, əvvəlki funksiyanı başqa metodlarla yeni cəmiyyət düzənində saxlamağın yollarını araşdırmalıyıq. Bunun üçün yalnız elmi yanaşma olmalıdır. Bəzən bəzi qurumlar deyir ki, biz bununla bağlı sosioloji sorğu aparmışıq. Səviyyəsiz və məntiqsiz sorğuları aparmağa ehtiyac yoxdur. Sadəcə olaraq dövlətin siyasəti və proqramı olmalıdır. Bir sosioloqun müsahibəsi, bir jurnalistin məqaləsi ilə iş həll edilmir. Biz həyəcan siqnalı çalmalıyıq. Azərbaycanın yeni nəslinin taleyi ortada fırlanır. Əgər hər 100 cütlükdən 30-u, 40-ı boşanırsa, deməli, bundan ikiqat artıq hissəsi də gərginlik içərisindədir. Çünki hər kəs boşanmır. Ən yaxşı halda Azərbaycanda 80 faiz ailədə gərginlik mövcuddur. Sabahın mütəxəssisləri, ailmləri, ziyalıları həmin ailələrdə gərginlik içərisində böyüyür. Hazırda Azərbaycanın ailə institutunda fövqəladə vəziyyət var. Buna müdaxilə etmək vacibdir. Ailələri, uşaqları bu gərginlikdən xilas eləmək lazımdır. Bunun üçün də aidiyyatı qurumların əməkdaşları işə gəlib-getməklə sadəcə maaş almağı düşünməməlidirlər. Həm də çox ciddi fəaliyyət planları hazırlamalıdırlar”.