“ABŞ və İran arasında aparılan nüvə danışıqları ərəfəsində regionun yeddi ölkəsinin liderləri, o cümlədən Azərbaycan Prezidenti rəsmi Tehranla əlaqə qurublar”.

Globalinfo.az xəbər verir ki, bunu İranın xarici işlər naziri Abbas Əraqçi deyib.

O bildirib ki, budəfəki danışıqların 2013-2015-ci illərdəki prosesdən əsas fərqi region ölkələrinin məsələdə ciddi iştirakıdır:

“Region ölkələrinin xarici işlər nazirləri ilə də bir neçə telefon danışıqlarım olub və davam edəcək. Biz onların xoş niyyətinə və səmimi səylərinə hörmətlə yanaşırıq. Bu ölkələrin gərginliyi azaltmaq, ekstremal vəziyyətlərin qarşısını almaq və tərəfləri danışıqlara təşviq etməklə bağlı rolları çox təsirli olub.

Region dövlətlərinin danışıqlara dəstəyi çox müsbətdir və biz məsləhətləşmələri davam etdirəcəyik. Regionun yeddi ölkəsinin liderləri Prezident Məsud Pezeşkianla telefon vasitəsilə əlaqə saxlayıb. Onlar danışıqlar barədə fikir mübadiləsi aparıb, təkliflər irəli sürüblər və İranın müsbət cavab verməsini xahiş ediblər. Bu ölkələr Türkiyə, Pakistan, Səudiyyə Ərəbistanı, Birləşmiş Ərəb Əmirlikləri (BƏƏ) Qətər, Misir və Azərbaycandır”.