26-27 yanvar tarixlərində ikinci ən yüksək intensivlik səviyyəsinə aid olan M sinifli günəş partlayışlarının baş verməsi mümkündür.

Publika.az xəbər verir ki, bu barədə Rusiya Tətbiqi Geofizika İnstitutunun mütəxəssisləri TASS agentliyinə açıqlama veriblər.

İnstitutun məlumatına görə, qeyd olunan günlərdə ümumi günəş aktivliyi əsasən aşağı səviyyədə qalacaq. Lakin ayrı-ayrı hallarda güclü partlayışların baş verməsi istisna edilmir.

Alimlər bildiriblər ki, Günəş alovları rentgen şüalanmasının gücünə görə beş kateqoriyaya bölünür: A, B, C, M və X. Ən zəif səviyyə hesab edilən A0.0 Yer orbitində hər kvadrat metrə təxminən 10 nanovat radiasiya axınına uyğun gəlir. Növbəti kateqoriyaya keçdikcə bu göstərici on dəfə artır.

Qeyd olunub ki, bu cür alovlanmalar adətən günəş plazmasının emissiyası ilə müşayiət olunur. Əgər yüklü hissəciklərdən ibarət buludlar Yerə çatarsa, bu, maqnit qasırğalarına səbəb ola və peyklərin fəaliyyətinə, rabitə sistemlərinə, eləcə də elektrik şəbəkələrinə mənfi təsir göstərə bilər.