İranda etiraz aksiyalarının səngiməsindən sonra müxtəlif bölgələrdə kütləvi həbslərin qeydə alındığı bildirilir.

Məlumata görə, yanvarın 20-də SEPAH-ın təhlükəsizlik bölməsinin əməkdaşları Qəzvin şəhərində 166 nəfəri həbs edib. Bununla yanaşı, Rəzəvi Xorasan əyalətində 192, İsfahan şəhərəində 73 etirazçının saxlanıldığı bildirilib.

Ümumiyyətlə, İranda bundan sonrakı mərhələ üçün nə gözlənilir?

Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu Globalinfo.az-a açıqlamasında deyib ki, İranda etiraz dalğasının güc yolu ilə yatırılması problemin həll edildiyi mənasına gəlmir:

“İranın aksiyaların davam etdiyi müddətdə ABŞ ilə pərdəarxası danışıq aparması yüksək ehtimaldır və yaxın günlərdə iki ölkə arasındakı münasibətlərin gedişi bunu tam aydınlaşdıracaq. ABŞ ilə ciddi qarşıdurma vəziyyətində olan Avropa İttifaqının İrana qarşı sanksiyaları sərtləşdirəcəyi ilə bağlı verdiyi mesajlar bu ehtimalı daha da gücləndirir. Rəsmi Ankaranın ABŞ-da Prezident Donald Tramp hökuməti ilə çox yaxın münasibətləri var. Türkiyənin Xarici işlər naziri Hakan Fidan İran-ABŞ dialoqu üçün vasitəçilik edə biləcəyinin mesajını vermişdi. ABŞ də İranın bütövlüyünün qorunmasında və hazırki rejimlə işləməkdə maraqlı olduğu üçün təzyiqlərini artırmaqla yanaşı, diplomatik kanalları açıq tutur. Pərdəarxası danışıqlar xüsusilə Türkiyə vasitəsilə aparılır.

Türkiyə də İranda xaotik mənzərənin yaranmasına qarşıdır, çünki belə olacağı halda, ilk növbədə Ankara ciddi təhdidlərlə üz-üzə qala bilər. Ona görə də Türkiyə İran məsələsini özünün milli təhlükəsizlik məsələsi hesab edir və Tehranın Qərblə münasibətlərinin normallaşmasına, İrandakı mühafizəkar qüvvələrin prosesi sabotaj etməməsinə, həm dini rəhbərlik, həm də hökumətlə danışıqlar apararaq vəziyyətin nəzarət altında qalmasına çalışır”.

Əli Zülfüqaroğlu diqqətə çatdırıb ki, İranın ali rəhbəri Ayətullah Xameneinin əhalinin sosial problemlərinin olmasını etiraf etməsi ictimaiyyətə mesaj baxımından yetərli deyil:

“Bu problemlərin həlli istiqamətində təcili addımlar atılmalıdır. Bunun üçün İranın beynəlxalq münasibətlərinin qaydaya düşməsi ilə yanaşı, daxildə köklü və təxirəsalınmaz islahatlar həyata keçirilməlidir. Qərb və qonşu ölkələrlə münasibətlərin inkişafı və daxildə açılıma gedilməsi üçün Prezident Məsud Pezeşkianın tezisləri praktiki mərhələyə daşınmalıdır. Belə olmayacağı təqdirdə İranı daha ciddi böhran və xaos gözləyir”.