Türkmənistandan idxal olunan qazın kəsilməsindən sonra İranda qazın təzyiqinin azalması ciddi təhlükə yaradıb. Artıq İranın 5 əyaləti üzrə xəbərdarlıq edib.

Publika.az İSNA-ya istinadla xəbər verir ki, bu barədə İranın Qaz İdarəetmə Mərkəzinin rəhbəri Məhəmməd Rza Culayi deyib.

İranda qazın təzyiqinin azalmasını göstərən xəritə

"İranın şimal-şərqdə temperaturun kəskin aşağı düşməsi, daxili istehlakın artması və Türkmənistandan gələn qazın kəsilməsi səbəbindən ölkənin şimal-şərqində qazın verilişi çətinləşib. Qaz istehlakının həcmi eyni şəkildə davam edərsə, Xorasan-e-Rəzəvi, Şimali Xorasan, Cənubi Xorasan, Gülüstan və Mazandaran əyalətləri problemlərlə üzləşəcək", - o qeyd edib.

Culayi bildirib: "Biz xətlərin bütün imkanlarından istifadə edirik, lakin təəssüf ki, istehlak çox yüksəkdir. Bizim iki yüksək istehlak əyalətimiz Xorasan-e-Rəzəvi və Mazandaran bu ərazidə yerləşir ki, bu da işi çox çətinləşdirir. Xüsusilə ölkənin şimal-şərq bölgəsində olan həmvətənlərimizin əziyyət çəkir".