Venesuela müxalifətinin lideri Mariya Korina Maçadonun Nobel medalını ABŞ Prezidenti Donald Trampa təqdim etməsi beynəlxalq aləmdə diqqət çəkib. Ağ Ev rəhbəri bu addımı jest kimi dəyərləndirsə də, Nobel Komitəsi daha əvvəl mükafatın geri alına və ya başqa şəxsə verilə bilməyəcəyini bildirib. Digər tərəfdən iddialara görə, ABŞ lideri uzun müddətdir Nobel Sülh Mükafatını arzulayır və Venesuela Prezidenti Nikolas Maduronu ələ keçirmək səbəbi də məhz budur.

Nobel Komitəsi hansısa addım atacaqmı? Trampın Maduronu qaçırmasının arxasında dayanan səbəblərdən biri bu ola bilərmi?

Globalinfo.az-a danışan politoloq Züriyə Qarayeva deyib ki, Maçadonun şəxsi qərarla Nobel Sülh Mükafatı medalını Trampa təqdim etməsi hüquqi baxımdan heç bir nəticə doğurmur:

“Çünki Nobel Komitəsinin qaydaları mükafatın başqa şəxsə ötürülməsini tanımır və belə bir aktı hüquqi statusu olmayan simvolik jest kimi qəbul edir. Komitə adətən siyasi xarakterli addımlara birbaşa reaksiya vermir. Lakin vəziyyət beynəlxalq mediada müzakirə doğuracağı təqdirdə, prosedur qaydalarının pozulmadığını vurğulayan qısa açıqlama verməsi mümkündür. Bu baxımdan Komitənin mükafatı geri almaq, ləğv etmək və ya hər hansı sanksiya tətbiq etmək kimi addımlar atacağı real deyil. Hadisə daha çox Venesuela müxalifəti daxilində, o cümlədən ABŞ-da siyasi mesaj xarakteri daşıyır və Nobel sisteminin institusional çərçivəsini dəyişmir”.

Politoloq bildirib ki, Maduro ilə bağlı səsləndirilən fikirlər siyasi spekulyasiyadır:

“Donald Tramp öz siyasi gündəmində Nobel mövzusunu uzun müddətdir önə çıxarırdı. Bu da sözügedən jestin onun siyasi ambisiyalarına uyğunlaşdırıldığını göstərir. Amma Maçadonun mükafatı simvolik olaraq ona verməsi medalın siyasi alver predmetinə çevrilməsi barədə müzakirələr yaradır, nəticədə Nobel Sülh Mükafatının ictimai imicinə müəyyən zərbə vurur. Mükafatın ideoloji məqsədlər üçün istifadə olunması onun neytrallıq və universallıq prinsipinə zidd görünə bilər, lakin institusional baxımdan nüfuzuna ciddi, uzunmüddətli xələl gəlməsi ehtimalı azdır. Çünki Nobel Komitəsi verilən qərarın yalnız rəsmi sahibə aid olduğunu və heç bir qeyri-rəsmi transferə legitimlik tanımadığını açıq şəkildə qoruyur”.