Rusiyalı jurnalist, Kremlin əsas təbliğatçılarından Vladimir Solovyovun sonuncu açıqlaması rezonans doğurub. O, Moskvanın Ukraynada həyata keçirdiyi hərbi əməliyyatların Ermənistan və Mərkəzi Asiyaya da tətbiq edilməli olduğunu söyləyib.

Jurnalist Moskvanın Ermənistanı itirməsinin ciddi nəticələr doğura biləcəyini vurğulayıb.

Rusiya Solovyov vasitəsilə Ukraynadan sonrakı işğal hədəflərini açıqlayır? Azərbaycan da bu planın daxilində ola bilərmi?

Globalinfo.az-a danışan deputat Müşfiq Cəfərov deyib ki, son günlər Rusiya-Ukrayna müharibəsi fonunda verilən açıqlamalarda yeni işğal planlarından da bəhs edilir:

“Kremlin ən aparıcı təbliğatçılarından olan Vladimir Solovyov növbəti dəfə hədələyici tərzdə danışaraq postsovet ölkələrini hədəfə gətirməyə cəhd edib. Solovyov daha əvvəl Azərbaycan Prezidenti İlham Əliyevin III Şuşa Qlobal Media Forumunda ukraynalı jurnalistə “işğalla heç zaman barışmayın” deməsini də Rusiyaya qarşı təhdid kimi qələmə vermişdi. Kremlin təbliğatçısı zaman-zaman Azərbaycanı da hədəf göstərir. Ölkəmizi iqtisadi sanksiyalarla təhdid edən Solovyov, hətta Azərbaycanla Rusiya arasındakı birbaşa sərhədi xatırladaraq, hərbi müdaxiləyə işarə vurmuşdu.

Kremlin "Maduro planı"nda fiasko: Zəngəzur dəhlizi Ermənistanı xilas etdi
Müşfiq Cəfərov

Ümumiyyətlə hazırda Rusiyanın vəziyyəti heç də onun təbliğat maşınlarının çıxışlarındakı kimi deyil. Ukrayna ilə illərdir davam edən müharibədən sonra Rusiyanın açıq aşkar başqa bir ölkəyə hücum etməsi elədə asan deyil. Bəli, indi Rusiya Cənubi Qafqazı itirməyin əsəbini yaşayır. Çünki regiondakı əsas dayağı olan Ermənistan da onun əmrindən çıxıb.

Belə bəyənatlar Rusiyanın dəyişməyən imperialist siyasətinin davamıdır. Bu dövlət hər zaman münasibətləri istədiyi kimi qura bilmədiyi ölkə ilə hədə qorxu dilində danışıb.”

Atlas Araşdırmalar Mərkəzinin rəhbəri, politoloq Elxan Şahinoğlu deyib ki, Vladimir Solovyov Kremlin tapşırıqlarını yerinə yetirir:

“O, bu dəfə Kremlin arzularını səsləndirməyə başlayıb. Rusiya Prezidenti Vladimir Putin SSRİ-nin dağılmasını böyük faciə adlandırmışdı. Kreml sahibi imperiyanın bərpasını arzulasa da, Rusiyanın hazırki imkanları daxilində bunun mümkün olmadığının fərqindədir. Rusiya 4 ildir Ukrayna müharibəsində ilişib qalıb. Əgər Ukraynada uğur qazansaydı, diqqətini başqa istiqamətlərə yönəldəcəkdi. Buna baxmayaraq, Kreml Solovyovun dili ilə gələcək planlarını səsləndirir.

ABŞ Prezidenti Donald Trampın təlimatıyla Venesuela Prezidenti Nikolas Maduronun oğurlanması və Ağ Ev sahibinin “mənim beynəlxalq hüquqa ehtiyacım yoxdur, nəyi doğru bilirimsə, onu da edirəm” səpgili açıqlaması Moskvanın hakim və ekspert dairələrində oxşar tezisin müzakirəsinə səbəb olub. Bu ölkənin siyasətçiləri və ekspertləri arasında, – “Rusiya da ABŞ kimi ətrafında bildiyini etməyə başlaya bilərmi?” sualı ilə bağlı müzakirələr başlayıb. Yəni onların fikrincə, Vaşinqtonun “Monro doktrinası” varsa, Kremlin də ya oxşar doktrinası olmalı, ya da mövcud təhlükəsizlik doktrinası ciddi şəkildə korrektə edilməlidir. Halbuki Rusiya prezidenti amerikalı həmkarından çox əvvəl “beynəlxalq hüquqa” riayətdən imtina edib. Rusiyanın 2008-ci ildə Gürcüstana qarşı müharibəsi, 2014-cü ildə Krımı ilhaqı və 2022-ci ildə Ukraynanın şərqini işğal etməsi bunun bariz nümunəsidir. Ancaq Kremlə bu azlıq edir”.

Politoloq bildirib ki, Mərkəzi Asiya və Cənubi Qafqaz ABŞ və Avropa İttifaqı ilə siyasi-iqtisadi əlaqələri genişləndirmək yolunu tutub:

“Kremlə yaxın bir qrup ekspert hesab edir ki, ABŞ-ın “Monro doktrinasına” zidd olaraq Avrasiya qitəsinə, o cümlədən sürətlə Mərkəzi Asiyaya və Cənubi Qafqaza nüfuz etməsinə qarşı Rusiya müqavimət göstərməlidir. Bunu deyənlər Rusiyanın hansı resurslar hesabına qonşu ölkələri siyasi, iqtisadi və hərbi orbitinə daxil edəcəklərini izah edə bilmirlər. Digər tərəfdən Rusiyaya qonşu olan ölkələr Ukraynaya qarşı işğalçı müharibədən dərslərini alıblar. Bölgə ölkələrinin ABŞ və Avropa İttifaqı ilə müqavilələr imzalamalarına paralel olaraq, Çinin Avrasiya bölgəsində artan rolu, Türk dövlətləri arasında inteqrasiya proseslərinin sürətlənməsi, Türkiyə-Azərbaycan ittifaqı, o cümlədən “Tramp yolu”nun (Zəngəzur dəhlizi-red.) yaxın gələcəkdə həyata vəsiqə qazanması Rusiyanın özünə uyğun “Monro doktrinasının” reallaşması imkanlarını minimuma endirir. Buna baxmayaraq, Rusiyaya qonşu olan heç bir ölkə müdaxilə təhlükəsindən sığortalanmayıb. Bu məqsədlə sözügedən ölkələrin öz aralarında ittifaqları gücləndirməsinə ehtiyac var. Azərbaycan Türkiyə ilə ittifaqı gücləndirməli, türk dünyasının interqasiyasında başlıca rollardan birini oynamaqda davam etməlidir”.