Türkiyədə hava şəraitinin kəskin dəyişməsi vətəndaşlarımız arasında da ciddi müzakirə obyekti olub. Hazırda qonşu ölkədə həyat demək olar ki, iflic vəziyyətindədir. Belə ki, 54 aviareys təxirə salınıb, təhsil ocaqlarında fasilə elan edilib.

Azərbaycanda da hava şəraitinin bu cür kəskin dəyişməsi gözlənilirmi? Növbəti günlərdə ölkədə temperatur necə olacaq?

Globalinfo.az-a danışan “Səma və Eko” Sosial İqtisadi İnkişafa Yardım İctimai Birliyinin sədri, ekoloq İradə Həsənova deyib ki, İstanbulda müşahidə olunan hava şəraiti əsasən Sibir və Şimaldan gələn soyuq hava kütlələrinin təsiri ilə bağlıdır:

“Bu da Türkiyənin qərb hissəsində temperaturun düşməsinə, qar yağışına və ciddi nəqliyyat problemlərinə səbəb olur. Demək olar ki, bütün ölkəni soyuq dalğa bürüyüb və 23 dərəcəyə qədər aşağı temperatur qeydə alınıb. Bu cür hava dalğaları bəzən bir neçə gün davam edə bildiyindən məktəblərin bağlanması, uçuşların ləğv edilməsinə şərait yaranır.

Yaxın günlərdə Bakıda və Abşeron yarımadasında küləkli, əsasən dəyişkən buludlu və yağmursuz hava şəraiti gözlənilir. Rəsmi proqnozlara görə, növbəti 2-3 gün ərzində paytaxtda temperatur aşağı düşəcək. Son günlər şimal-qərb küləkləri 30-35 m/s-dək güclənib, yağış və şimşək müşahidə olunub, temperatur təxminən 10 dərəcə aşağı düşüb. Dağlıq ərazilərdə qar yağıb, aran rayonlarında isə şaxta qeydə alınıb”.

Ekoloq bildirib ki, soyuq hava kütlələrinin bir regiondan digərinə yayılması ümumi atmosfer sistemlərinin hərəkətindən asılıdır:

“Şimaldan gələn soyuq hava kütləsi Qara dəniz boyunca və Şərqi Avropadan əvvəlcə Türkiyəyə təsir göstərir. Bəzən bu kütlə daha da Şərqə doğru irəliləyə və Cənubi Qafqazı da əhatə edə bilər. O cümlədən Azərbaycana da təsirsiz ötüşməyəcək. Bu həftə ərzində ölkədə temperaturun bir qədər aşağı düşməsi və dağlıq ərazilərdə şaxta olacağı gözlənilir. Əgər atmosfer sistemləri dəyişsə və soyuq hava kütləsi daha da Şərqə doğru irəliləsə, o zaman təsir daha da güclənə bilər. Ümumiyyətlə, yaxın 7 gün ərzində Azərbaycanda dramatik soyuq hava dalğası İstanbulda olduğu qədər kəskin olmayacaq. Temperatur aşağı düşəcək, lakin böyük qar yağışı ehtimalı hələlik görünmür. Xüsusilə həftənin sonuna doğru gün ərzində qısamüddətli şaxtaların müşahidə olunması mümkündür. Əgər Şimal və Şimal-Şərqdən gələn güclü hava kütlələri daha da dərinləşərsə, o zaman temperatur normadan xeyli aşağı düşə bilər”.