Türkiyənin Milli Kəşfiyyat Təşkilatının (MİT) rəhbəri İbrahim Kalın İstanbulda Fələstin HƏMAS hərəkatının nümayəndələri ilə Qəzza sektorunda sülhün bərpasına dair planın ikinci mərhələsini müzakirə edib.

Globalinfo.az xəbər verir ki, bu barədə TRT telekanalı təhlükəsizlik mənbələrinə istinadən məlumat yayıb.

Danışıqlarda HƏMAS nümayəndə heyətinə hərəkatın siyasi bürosunun üzvü Xəlil əl-Həyyə rəhbərlik edib. Mənbənin bildirdiyinə görə, HƏMAS atəşkəs şərtlərinə əməl etdiyini açıqlayıb və İsrail tərəfinin yol verdiyi pozuntularla bağlı məlumat təqdim edib.

Görüş zamanı Qəzzada atəşkəs rejiminin qorunması istiqamətində Türkiyənin zəmanətçi ölkə kimi göstərdiyi intensiv səylər xüsusi vurğulanıb. Həmçinin İsrail tərəfindən mümkün yeni pozuntuların qarşısının alınması üçün atılmalı olan addımlar müzakirə edilib.

Mənbə qeyd edib ki, Qəzzada sülh planının ikinci mərhələsinə keçid üçün zəruri şəraitin yaradılması, mövcud problemlərin həlli yolları ilə bağlı da məsləhətləşmələr aparılıb. Bundan əlavə, Türkiyə tərəfi Qəzzaya humanitar yardımın çatdırılması istiqamətində görülən işlər barədə məlumat verib və region ölkələri ilə beynəlxalq təşkilatların əlavə yardımın təmin olunması üçün göstərdikləri cari səylər müzakirə edilib.