Dekabrın 1-nə keçən gecə Dağıstanın Kaspiysk şəhəri üzərində Ukrayna Silahlı Qüvvələrinə məxsus olduğu bildirilən pilotsuz uçuş aparatlarının genişmiqyaslı hücumu ilə bağlı bir sıra versiyalar üzə çıxıb.

Globalinfo.az xəbər verir ki, Rusiyanın əməkdar hərbi pilotu, general-mayor Vladimir Popov “AİF”ə açıqlamasında hücumun ehtimal olunan mənbələri barədə danışıb.

Onun sözlərinə görə, dronların Ukrayna ərazisindən birbaşa buraxılması real görünmür.

Popov bildirir ki, PUA-ların qonşu ölkələrin sərhədyanı ərazilərindən buraxılması versiyası daha inandırıcıdır. O, təxribat və kəşfiyyat qruplarının turist və ya digər mülki qiyafələr altında bölgəyə daxil ola biləcəyini istisna etmir.

General-mayorun açıqladığı ikinci ssenari Xəzər dənizi ilə bağlıdır. O hesab edir ki, dronlar dənizdə olan qayıqlar və ya gəmilərdən, balıqçı və turist qrupları kimi maskalanmış şəxslər tərəfindən buraxıla bilər.

“Həmçinin dağlıq ərazilərdə dron anbarlarının qurulması və xüsusi katapultlarla buraxılış ehtimalı da nəzərdən keçirilir. Lakin indiki halda Xəzər dənizi ərazisindən hücuma keçmə ehtimalları olduqca yüksəkdir. Hücum sadaladığım versiyalardan biri kimi həyata keçirilib”, – deyə o bildirib.