Müdafiə naziri Denis Şmıxal, Ukrayna Müdafiə Nazirliyinin Baş Kəşfiyyat İdarəsinin rəisi Kiril Budanov və baş nazirin birinci müavini Mixaylo Fedorov Volodimir Zelenskinin prezident aparatının rəhbəri vəzifəsinə potensial namizədlərdir.

Publika.az xəbər verir ki, bunu "Axios" jurnalisti Barak Ravid "X"dəki hesabında yazıb.

O qeyd edib ki, baş nazirin müavini respublikanın Müdafiə Nazirliyinə də rəhbərlik edə bilər.

Noyabrın 28-də Ukrayna liderinin aparatının rəhbəri Andrey Yermakın mənzilində axtarışlar aparılıb. Onun adı dövlətə məxsus "Energoatom" şirkətində korrupsiya sxemi ilə bağlı istintaqda hallanır və müstəntiqlər bu sxemin iş adamı və uzun müddət Zelenskinin köməkçisi olan Timur Mindıç tərəfindən təşkil olunduğuna inanırlar.

Elə həmin gün Ukrayna Prezidenti Yermakın işdən çıxarıldığını elan edib.

Yermak "New York Post" qəzetinə verdiyi müsahibədə "rüsvayçılıq" hiss etdiyini və həqiqəti bilən köməkçilərinin onu dəstəkləmədiyini bildirib. Buna baxmayaraq, keçmiş ofis rəhbərinin Zelenski üçün problem yaratmaq niyyəti yoxdur və o, cəbhəyə getmək niyyətindədir.