Venesuelanın müdafiə naziri Vladimir Padrino Lopez ABŞ-ın Karib dənizi regionunda artan hərbi fəaliyyətini əsas gətirərək ölkədə 200 min əsgərin səfərbər edildiyini bildirib.

Lopez Karibdəki hərəkətliliyin ABŞ-dakı ciddi daxili problemlərdən diqqəti yayındırmağa hesablandığını qeyd edib. Nazir həmçinin ölkə miqyasında başladılan səfərbərliyin iki gün davam edəcəyini, bundan sonra vəziyyətə əsasən yeni qiymətləndirmənin aparılacağını söyləyib.

Globalinfo.az-a danışan politoloq Aytən Qurbanova deyib ki, son günlərdə Karib dənizi regionunda baş verən hadisələr və Venesuela rəhbərliyinin bəyanatları beynəlxalq gündəmin diqqət mərkəzinə çevrilib:

“Venesuela tərəfi, xüsusilə də rəsmi şəxslər ABŞ Dövlət Departamentinin yaydığı bəyanatların və ittihamların regionda sülh və sabitliyə təhdid yaratdığını bildirirlər. Venesuela rəsmilərinin fikrincə bu cür çıxışlar Vaşinqtonun daxili sosial-siyasi problemlərdən diqqəti yayındırmaq və regionda təsir imkanlarını qorumaq məqsədi daşıyır.

İlk növbədə onu qeyd etmək lazımdır ki, bəyanatda vurğulanan “sülhün təhdidi” məsələsi yalnız siyasi ritorika deyil, həm də real təhlükəsizlik narahatlığını əks etdirir. ABŞ-ın son illərdə Karib dənizi yaxınlığında həyata keçirdiyi hərbi təlimlər, kəşfiyyat uçuşları və dəniz müşahidə missiyaları Venesuela tərəfindən təxribat kimi qiymətləndirilir”.

Politoloq bildirib ki, region ölkələrinin bir hissəsi balanslı mövqe saxlamağa çalışırlar:

“Çünki regionda hər hansı hərbi toqquşma enerji və ticarət marşrutlarını və dəniz təhlükəsizliyini birbaşa təhdid edə bilər.

Nəticə etibarilə, indiki məqamda Karib dənizi regionunda baş verən hadisələr yalnız ABŞ və Venesuela arasında qarşıdurma deyil, həm də qlobal güclərin təsir dairəsi uğrunda mübarizəsinin bir hissəsidir. Ona görə də, Karib dənizində sülh və sabitliyin qorunması qarşıdurma deyil, dialoq və qarşılıqlı etimad mexanizmlərinin gücləndirilməsindən asılıdır. Əks halda, bu gərginlik regional iqtisadi əlaqələrə, enerji təhlükəsizliyinə və beynəlxalq münasibətlər sisteminə mənfi təsir göstərə bilər”.