Ermənistan Prezidenti Vahaqn Xaçaturyan ölkənin Avropa İttifaqına (Aİ) üzv olmaq niyyətini təsdiqləyən qanunu imzalayıb.

Modern.az-ın məlumatına görə, bu barədə Xaçaturyanın mətbuat xidməti məlumat yayıb.

Qanun 2024-cü il martın 26-da Ermənistan parlamenti tərəfindən qəbul olunub. Sənədə əsasən, Aİ-yə üzvlüklə bağlı yekun qərar yalnız ümumxalq referendumu əsasında verilə bilər.

Lakin bu addımın özü belə, artıq Ermənistanın prioritetlərini dəyişdirdiyini göstərir. Ermənistanın Aİ-yə üzv olmaq üçün konkret dəvət almadığı bildirilsə də, rəsmi İrəvanın qərarı Brüssellə münasibətləri dərinləşdirmək istəyindən xəbər verir.

Ermənistanın bu qərarı Rusiyanın kəskin reaksiyasına səbəb olub. Moskva hesab edir ki, Ermənistanın eyni anda həm Aİ, həm də Avrasiya İqtisadi İttifaqında (Aİİ) üzv qalması mümkün deyil. Rusiya rəsmiləri bu vəziyyətin İrəvan üçün "seçim anı"nın yetişdiyini göstərdiyini bildiriblər.

Rusiya Prezidentinin mətbuat katibi Dmitri Peskov qeyd edib ki, Ermənistan daxilində Aİ-yə inteqrasiyanı ölkəyə əlavə fayda gətirəcək addım kimi dəyərləndirən qüvvələr var.

Ermənistan isə hələlik Aİİ-dən çıxmaq niyyətində olmadığını açıqlayıb. Buna baxmayaraq, 2023-cü ilin sonundan bəri Ermənistan Xarici İşlər Nazirliyi Avropa yönümlü siyasətə meyl etdiklərini və Aİ-yə üzvlüyün aktiv şəkildə müzakirə olunduğunu bildirmişdi. Mart ayında isə Aİ-yə daxilolmanın nəticələrinin əvvəlcədən proqnozlaşdırıla bilməyəcəyini qeyd etmişdilər.

Rusiya Baş nazirinin müavini Aleksey Overçuk da Ermənistanın Aİ-yə üzvlük qərarının ölkəni strateji seçim qarşısında qoyduğunu söyləyib. Onun fikrincə, bu, təkcə siyasi deyil, həm də iqtisadi baxımdan ciddi nəticələrə yol aça bilər.

Aİ ilə yaxınlaşma fonunda, Rusiya Ermənistanla münasibətlərini yenidən nəzərdən keçirə və bölgədəki nüfuzunu qorumaq üçün müəyyən addımlar ata bilər.

Müşahidəçilər bildirirlər ki, Moskva Ermənistanın qərarına sərt cavab verə və hətta iqtisadi və siyasi təzyiqlərə əl ata bilər.

Bəzi analitiklər isə qeyd edirlər ki, Ermənistanın Avropa İttifaqına inteqrasiya istiqamətində atdığı bu addımlar Rusiyaya yönəlik siyasi manevr – bir növ təzyiq aləti də ola bilər. Belə ki, Ermənistan Baş naziri Nikol Paşinyanın Qərbə üz tutmaqla Rusiya Prezidenti Vladimir Putini dolayısı ilə şantaj etdiyi bildirilir. Məqsəd isə Kremldən daha çox iqtisadi və ya siyasi güzəştlər qoparmaq, həmçinin Moskvanın Ermənistanla bağlı siyasətində dəyişikliklərə nail olmaqdır.

Gələcək aylarda bu proseslərin hansı istiqamətdə inkişaf edəcəyi Rusiya və Qərbin reaksiyasından asılı olacaq.