Azərbaycan, Gürcüstan və Türkiyə müdafiə nazirlərinin Ankarada 12-ci üçtərəfli görüşü keçirilib. Bu görüşlə paralel olaraq Sankt-Peterburq şəhərində Xəzəryanı ölkələrin Hərbi Dəniz Qüvvələri (HDQ) komandanlarının toplantısı baş tutub. Hər iki görüş protokol xarakteri daşısa da, kifayət qədər diqqət çəkir.

Sankt-Peterburq görüşündə Xəzər dənizində regional təhlükəsizlik, hərbi-dəniz əməkdaşlığı, birgə təlimlərin təşkili və digər qarşılıqlı maraq doğuran məsələlər müzakirə olunub. Maraqlıdır ki, təhlükəsizlik müzakirə mövzusu olsa da, regiona ən ciddi təhdidin məhz Rusiya və İran tərəfindən edildiyi məlumdur.

Globalinfo.az-a danışan Siyasi və Hüquqi Araşdırmalar Mərkəzinin sədri, politoloq Xəyal Bəşirov bildirib ki, Azərbaycan mövcud təhlükələr fonunda əlaqələrini müxtəlif istiqamətlərdə inkişaf etdirməklə regionda sabitliyin qorunmasına töhfə verir:

“Rəsmi Bakı dəfələrlə bəyan edib ki, heç bir hərbi bloka və qurulmuş oyunlara qoşulmur. Xarici siyasətimiz ayrı-ayrı dövlətlərlə münasibətlərə, beynəlxalq təşkilatlarla əməkdaşlığa əsaslanır. Heç kim bizi hansısa hiyləgər planların tərkib hissəsi kimi təqdim edə bilməz. Zaman-zaman bu istiqamətdə müəyyən iddialar səslənsə də, heç biri təsdiqini tapmayıb.

Azərbaycan heç bir halda regionda təhlükəli vəziyyətin yaranmasına şərait yaratmayacaq, susqun qalmayacaq. Bakı əlaqələrini müxtəlif istiqamətlərdə gücləndirir. Qoşulmama Hərəkatında atdığı addımlar, BMT-yə üzvlük, Türk Dövlətləri Təşkilatının yaradılmasında və inkişafında oynadığı önəmli rol, İslam Əməkdaşlıq Təşkilatı ilə əlaqələr – bütün bunlar ölkəmizin xarici siyasətinin əsas prioritetlərindəndir.

Azərbaycan daim bərabərhüquqlu əməkdaşlığa üstünlük verir. Bu əməkdaşlıq qarşılıqlı hörmət, daxili işlərə qarışmamaq və tərəflərin maraqlarına hörmət prinsipləri üzərində qurulub”.

Politoloq vurğulayıb ki, həm Sankt-Peterburq, həm də Ankarada keçirilən görüşlər Azərbaycanın müxtəlif güc mərkəzləri ilə balanslı siyasət yürütməsinin göstəricisidir:

“Cənubi Qafqazda formalaşmış yeni reallıqlar təkcə Azərbaycan üçün deyil, bütövlükdə regionun və səmimi tərəfdaşların maraqlarına uyğundur. Bu reallığa qarşı çıxmaq, əslində, bölgədəki sabitliyə və təhlükəsizliyə qarşı çıxmaq deməkdir. Azərbaycan Rusiya, İran, Türkiyə, yaxud istənilən dövlətlə əməkdaşlıq edər. Lakin təxribat xarakterli hər hansı addıma da layiqli cavab verməyi bacarır.

Əməkdaşlıq o demək deyil ki, həmin dövlətlər Azərbaycanın daxili işlərinə müdaxilə edə və ya maraqlarımıza zidd addımlar ata bilər.

Azərbaycan-Türkiyə-Gürcüstan müdafiə nazirlərinin görüşləri artıq 12-ci dəfədir keçirilir. Bu görüşlərin əsas məqsədi regionda sülh və sabitliyin təmin edilməsidir. İlk görüşlər zamanı torpaqlarımızın 20 faizi işğal altında idi, ciddi təhdidlər vardı. Bu gün isə həmin problemlər öz həllini tapıb”.

Xəyal Bəşirov həmçinin Xəzəryanı ölkələrin HDQ komandanlarının görüşünün vacibliyini vurğulayıb:

“Azərbaycan üçün Xəzər dənizi həmişə strateji əhəmiyyət kəsb edib. Rəsmi Bakı burada yürütdüyü siyasətə 10 il əvvəl necə yanaşırdısa, indi də eyni xətti davam etdirir. Cənubi Qafqazda təhlükəsizliyin təmin olunması paralel şəkildə Xəzər dənizindəki mümkün təhdidlərin də aradan qaldırılmasına xidmət edir”.