Azərbaycana qarşı hərbi cinayətlərdə ittiham olunan və Bakıda məhkəməsi davam edən ermənilərin Ermənistana təhvil verilməsi məsələsi təkrar gündəmə gətirilib. Lakin rəsmi Bakının İrəvana bu mövzuda mövqeyini qəti şəkildə bildirdiyi, həmin şəxslərin buraxılmasının mümkün olmadığını vurğuladığı qeyd olunur. Məlumata görə, Azərbaycan tərəfi ümumiyyətlə bu mövzunun beynəlxalq səviyyədə qaldırılmamasını tələb edib.

Həmçinin İrəvan hökumətinin də sözügedən şəxslərin qaytarılmasını istəmədiyi, sadəcə 2026-cı il parlament seçkiləri öncəsi ictimaiyyətin dəstəyini qazanmaq üçün bu məsələyə toxunduğu vurğulanır.

Globalinfo.az-a danışan politoloq Elşad Həsənov bildirib ki, Ermənistan 8 avqustda sülh müqaviləsinin paraflanmasına dair Azərbaycanla imzalanan sənədi ratifikasiya edib:

“Vaşinqton Bəyannaməsi imzalandı, Zəngəzur dəhlizinin açılması üçün “Tramp marşrutu” ilə bağlı razılıq əldə edildi. Azərbaycan Prezidenti İlham Əliyev və Ermənistanın Baş naziri Nikol Paşinyan ATƏT-in Minsk qrupunun ləğvi üçün birgə müraciət etdilər, nəticədə o da yerinə yetirildi. Minsk qrupunun ləğvindən sonra qüvvədə qalan əsas məsələ Ermənistan Konstitusiyasının dəyişdirilməsidir.

Nikol Paşinyan həmin görüşdə ABŞ Prezidenti Donald Trampdan Bakıda məhkəməsi davam edən erməni hərbi cinayətkarların azad olunmasını xahiş etmişdi. Lakin Paşinyan bunu öz istəyi ilə etmir, anlayır ki, həmin şəxslər əslində onun özünə qarşıdırlar.

Azərbaycan hərbi cinayətkarları istintaqa cəlb etməklə İrəvana da yardım etmiş oldu. Həmin şəxslərin həbsi nəticəsində Rusiyanın Qarabağla bağlı planları da reallaşmadı. Onların məhkəməsi davam edir və uyğun qərarın veriləcəyi gözlənilir. Donald Tramp da bu məsələdə məhkəmənin qərarını gözləyir”.

Politoloq bildirib ki, Azərbaycanın hazırda yeganə tələbi konstitusiya dəyişikliyidir:

“Ermənistanda bu istiqamətdə işlərə başlanıb. Nikol Paşinyanın çıxışlarından da məlum olur ki, o, “real Ermənistan”ın real konstitusiyasının yaradılmasını irəli sürür, ölkəsinin miflərdən ayrılmalı olduğunu dəfələrlə vurğulayır.

2027-ci ilə qədər sözügedən prosesin başa çatacağı gözlənilir. Bu isə o deməkdir ki, sülh müqaviləsinin imzalanması həmin vaxta qədər uzanacaq. Lakin fikrimcə, 2026-cı ildə keçiriləcək parlament seçkilərinə qədər, yaxud da həmin ərəfədə konstitusiya dəyişikliyi baş tutacaq. Paşinyanın komandası bu istiqamətdə çalışır, amma ona mane olmaq istəyən qüvvələr də mövcuddur. Həmin şəxsləri də Rusiya dəstəkləyir. İrəvan isə Moskvanın təsirindən çıxaraq Qərbin “çətiri” altına girməkdədir.”