“Avqustun 30-da Azərbaycan Respublikası Prezidentinin köməkçisi – Prezident Administrasiyasının xarici siyasət məsələləri şöbəsinin müdiri Hikmət Hacıyev və Ermənistan Təhlükəsizlik Şurasının katibi Armen Qriqoryan arasında telefon danışığı olub”.

Globalinfo.az xəbər verir ki, bu iddia ilə “Hraparak” qəzeti çıxış edib.

Nəşrin məlumatına görə, telefon əlaqəsi Azərbaycan tərəfinin təşəbbüsü ilə baş tutub. Söhbətin əsas mövzusu isə Azərbaycana qarşı hərbi cinayətlər törətməkdə ittiham olunan və Bakıda məhkəməsi davam edən ermənilər olub. Belə ki, Vaşinqton görüşü zamanı Ermənistan nümayəndə heyəti ABŞ Prezidenti Donald Trampla müzakirədə bu məsələni qaldırıb. Onlar “xristian erməni məhbuslar”ın İrəvana verilməsini istəyiblər. Tramp da bu məsələyə mümkün çərçivədə baxılmasını Azərbaycan tərəfindən xahiş edəcəyini söyləyib.

“Hraparak” bildirir ki, Hikmət Hacıyev Qriqoryanla telefon danışığında bu məsələnin gündəmə gətirilməsinin Azərbaycan və Ermənistan arasında əldə olunan sülh razılaşması və münasibətlərin normallaşmasına xələl gətirə biləcəyini vurğulayıb. Həmçinin ölkəmizə qarşı cinayətlərdə əli olan ermənilərinin azad edilməsi məsələsinin nəzərdən keçirilmədiyini, bunun mümkün olmadığını qeyd edib.

Prezidentin köməkçisi həmin şəxslərin “xristian məhbuslar” adı ilə təqdimatının da doğru olmadığını nəzərə çatdırıb, bu mövzunun ümumiyyətlə qaldırılmamasını tələb edib. Məlumata görə, Hacıyevlə danışıqdan sonra Qriqoryan heç bir problem olmadığını deyib və razılaşaraq geri addım atıb.

Nəşr Ermənistan hökumətinin Bakıdakı şəxslərlə (hərbi cinayətlərdə ittiham olunan ermənilərlə – red.) maraqlanmadığını, sadəcə, 2026-cı ildə keçiriləcək seçki öncəsi ictimaiyyətin gözündə üstünlük qazanmaq üçün onlardan bir-ikisinin azadlığa çıxması üçün çalışdığını yazıb.