Dəməşqdə kilsəyə hücumun ardından terror təşkilatı İŞİD-in Suriyadakı yeni strukturu müzakirələrin mərkəzindədir.

Publika.az xəbər verir ki, bununla bağlı araşdırmanı Türkiyənin "Haber Qlobal" nəşri aparıb.

Bildirilir ki, “Sərəya Ənsar əs-Sünnə” şüarı altında qruplaşdırılmış qruplar kilsə hücumuna görə məsuliyyəti öz üzərinə götürür, YPG-yə bağlı bəzi media orqanları isə ardıcıl olaraq yeni İŞİD təhlükəsini vurğulayır. İŞİD-ə qarşı beynəlxalq koalisiyada ABŞ-ın dəstəklədiyi YPG bu vəziyyəti beynəlxalq miqyasda tez-tez işıqlandırır. Suriyada Əhməd Şaranın rəhbərliyi ilə milli birliyin möhkəmləndiyi bir vaxtda İŞİD-in canlanması suallar doğurur. Təhlükəsizlik və terror üzrə ekspert Güngör Yavuzarslan ABŞ-ın YPG-nin Suriyadakı mövqelərini gücləndirmək üçün yeni İŞİD təhlükəsindən istifadə edə biləcəyini bildirir.

YPG-dən verilən açıqlamalarda 2024-cü ilin sonunda Əsəd rejiminin süqutunun Suriya səhrasında təhlükəsizlik boşluğu yaratdığı və İŞİD-in bu boşluqdan istifadə etdiyi iddia edilir. Son məlumatlara görə, qruplaşmanın hücumları son aylarda xeyli artıb. Suriya İnsan Haqları Müşahidə Qrupunun (SOHR) məlumatına görə, İŞİD son iki ayda 32 hücum həyata keçirib. Bildirilib ki, İŞİD qeyri-sabit bölgələrdə yenidən təşkilatlanır və qorxu yayır.

Suriya Demokratik Qüvvələri (SDQ) mənbələri də ölkənin mərkəzi və cənub bölgələrindəki səhraya işarə edərək, İŞİD hücrələrinin xüsusilə Suriya səhrası və Suriya-İraq sərhədi boyunca yayıldığını iddia edib.

Yavuzarslan ABŞ-ın İŞİD-in varlığından sui-istifadə edə biləcəyini bildirərək, deyib ki, İraqdakı əl-Ambar bölgəsi və Suriyanın Homs kəndi Suriyada qalmaq üçün ABŞ-ın əlində bir vasitədir.

Yavuzarslan əlavə edib ki, İŞİD-in mövcudluğu davam edərsə, ABŞ "masa başı"na gələcək.

Qeyd edək ki, YPG terror təşkilatı üzərində mərkəzləşən SDQ Suriyada İŞİD-in varlığı ilə bağlı təbliğatını da gücləndirir. Beynəlxalq ictimaiyyətin İŞİD üzvlərinin saxlandığı həbsxana və düşərgələrdəki vəziyyətə məhəl qoymadığını iddia edən təşkilat, "İŞİD-in Suriya səhrasında yeni terror dalğası ilə genişlənəcəyini" iddia edir.