Azərbaycanın şimalında Rusiya ilə Ukrayna arasında müharibə, cənubunda isə İranla İsrail arasında gərginlik davam edir. Bu iki böyük regional qarşıdurmanın arasında yerləşən ölkəmiz üçün vəziyyət olduqca həssasdır.

Rəsmi Bakı bu iki atəş xətti arasında necə davranmalıdır ki, münaqişənin alovu ölkəmizin sərhədlərini keçməsin və bizi də təsir almasın? Savaşı uzun müddət sərhədlərimizdən uzaq saxlamaq mümkün olacaqmı?

Globalinfo.az-a danışan politoloq Kazım Kazımov bildirib ki, Azərbaycan illərdir münaqişəli regionda balanslı və prinsipial siyasət yürüdür:

“İran və İsrail arasındakı gərginlik 2023-cü ilin oktyabr ayından başlayaraq daha da kəskinləşib. Bu toqquşmalar keçən ildən bəri zaman-zaman davam edir. Eyni zamanda, Rusiya-Ukrayna müharibəsi də 2022-ci ildən bu günə qədər davam edir. Belə mürəkkəb və riskli münaqişələr şəraitində Azərbaycan bütün tərəflərlə əlaqələrini qorumağı bacarır, bölgədə stabilliyi ön planda saxlayır.

Rəsmi Bakı tez-tez sülh çağırışları edir, münaqişə tərəflərini danışıqlara və barışığa dəvət edir. Bu gün Azərbaycan uzun müddət belə gərginliklərdən kənarda qalacaq mövqedədir. Birincisi, ölkəmiz artıq regional gücə çevrilib və Azərbaycanı münaqişəyə çəkmək mümkün deyil, çünki qərarları özü verir.

Azərbaycanın üzv olduğu beynəlxalq təşkilatlar və artan xarici siyasət nüfuzu da göstərir ki, biz heç vaxt münaqişənin tərəfi olmayacağıq. Bir neçə il əvvəl Ermənistanla münaqişədə tərəf olmağımıza baxmayaraq, qazanılan qəti və şanlı qələbə dünyaya Azərbaycanın gücü və mövqeyi barədə geniş məlumat verdi. Bu uğur Azərbaycanı yalnız regional deyil, həm də beynəlxalq səviyyədə etibarlı və təsirli aktor kimi tanıtdı.

Bununla yanaşı, Azərbaycan hər zaman sülhün və dialoqun tərəfdarı olaraq, bölgədə sabitliyin qorunmasına və qarşılıqlı anlaşmanın güclənməsinə çalışır. Bu balanslı siyasət ölkəmizi həm iqtisadi, həm də siyasi baxımdan möhkəmləndirir və qarşıdakı illərdə də ölkəmizin inkişafına təminat verir”.