İran və İsrail arasında baş verən son hərbi eskalasiya regional təhlükəsizlik mühitini daha da gərginləşdirib. Lakin danışıqlar masasına dönüş ehtimalı da istisna edilmir.

Məlum olduğu kimi, gərginlik başlamazdan əvvəl İran və İsrail rəsmiləri arasında dolayı təmaslar mövcud idi və bu təmasların mühüm hissəsi Azərbaycan üzərindən həyata keçirilirdi. Rəsmi Bakı həm İranlı, həm də İsrailli nümayəndələrlə yüksək səviyyəli görüşlər keçirmişdi. İran danışıqlara açıq görünməsə də, artan təzyiqlər və itkilər Tehranı yenidən danışıqlar masasına oturmağa vadar edə bilər. Bu halda, Azərbaycanın neytral, lakin strateji mövqeyi ölkəmizi bir daha mümkün vasitəçi kimi önə çıxara bilər.

İsrailin Bakı ilə yaxın münasibətləri, İranın isə Azərbaycanla diplomatik körpüləri tam yandırmaması, əksinə, son aylar yaxınlaşması belə bir ssenarini real edir.

İndi isə sual yaranır: Müharibə fonunda belə bir diplomatik cəhd yenidən mümkün ola bilərmi?

Globalinfo.az-a danışan siyasi şərhçi Kənan Novruzov bildirib ki, davam edən hərbi toqquşma həm təhlükəsizlik, həm də diplomatik əlaqələr baxımından Azərbaycan üçün arzuolunan deyil:

“Hər şeydən əvvəl Azərbaycan öz sərhədlərini və hava məkanını gücləndirməlidir. Eyni zamanda bu gərginliyin davam etməsi strateji baxımdan da bizim maraqlarımıza uyğun deyil.

Çünki Azərbaycanın həm İsrail, həm də İranla normal və balanslı münasibətləri mövcuddur. Biz tərəfə çevrilməməliyik. Hərçənd buna cəhd göstərənlər, dezinformasiya yaymağa çalışan qüvvələr olacaq.

Azərbaycan dövləti və xalqı bu cəhdlərə qarşı hazırlıqlı olmalıdır. Rəsmi Bakı bölgədə vəziyyəti sabitləşdirmək üçün bütün mümkün diplomatik imkanlardan, o cümlədən vasitəçilik təşəbbüslərindən istifadə etməlidir. Dünən Xarici İşlər Nazirliyinin yaydığı bəyanatda da vasitəçiliyə hazır olmaq məsələsinə dolayı işarə var idi. Hərçənd bu prosesin asan olacağını düşünmək düzgün olmaz”.