Aprelin 20-də elan edilən Pasxa atəşkəsi Rusiya və Ukrayna arasında döyüşlərin heç olmasa qısa müddətə dayandırılması üçün bir fürsət kimi qiymətləndirilirdi. Lakin gözləntilərin əksinə olaraq, tərəflər atəşkəsə əməl etmədi və bir-birini onun pozulmasında ittiham etməyə başladılar. Atəşkəsin bu qədər qısa müddət ərzində uğursuzluğa düçar olması növbəti sülh təşəbbüslərinin taleyini sual altına salır.

Bəs bu hadisə Rusiya-Ukrayna müharibəsinin gedişinə hansı formada təsir edir?

Globalinfo.az-a danışan politoloq Kazım Kazımov bildirib ki, Pasxa və digər dini bayramlarda atəşkəs elan olunması dünya təcrübəsində müxtəlif nümunələrlə özünü göstərib:

“Yalnız Rusiya-Ukrayna müharibəsində deyil, başqa münaqişələr zamanı da dini bayramlarda atəşkəs elan olunub. Məsələn, ABŞ-ın Əfqanıstandakı hərbi əməliyyatları zamanı, Vaşinqton Talibanı terror təşkilatı kimi tanısa da, Ramazan bayramı dövründə qarşılıqlı razılaşma əsasında bir aylıq atəşkəs elan olunmuşdu. Eyni vəziyyəti İran-İraq müharibəsində də müşahidə etmişik”.

Politoloqun fikrincə, atəşkəsin reallaşması və ona əməl olunması mürəkkəb bir prosesdir:

“Rusiya-Ukrayna cəbhəsi olduqca genişdir. Dünənki Pasxa atəşkəsindən də göründü ki, tərəflər bir-birini atəşkəsi pozmaqda ittiham etməyə başladılar. Əslində, atəşkəsin qüvvəyə minməsi ilə onun tam icrası arasında müəyyən vaxt keçməlidir. Çünki qoşunların təmas xətti, informasiyaların qarşı tərəfə tam ötürülüb-ötürülməməsi və digər texniki məsələlər bu prosesə təsir edir”.

Kazım Kazımov qeyd edib ki, Pasxa atəşkəsinə əməl olunmaması gözlənilən idi:

“Hər iki tərəfin mövqeyi maksimalist xarakter daşıyır. Atəşkəsin davamlı olması üçün Rusiya və Ukraynanın maraqlarına uyğun, real şərtlər əsasında razılaşma əldə olunmalıdır”.