Son zamanlarda Rusiyanın Cənubi Qafqaz ölkələrinin xarici siyasət vektorundan kənarda qalması diqqət çəkir. Moskvanın region ölkələri ilə aktiv və isti münasibətləri əvvəlki kimi yüksək səviyyədə müşahidə olunmur.

Xüsusilə Azərbaycanın xarici siyasətində Moskvanın iştirakı nəzərə çarpmır. Prezident İlham Əliyev Şərq, Qərb və Cənubla uğurlu münasibətlər sistemini inkişaf etdirir. Dövlət başçısının apreldə Çinə səfəri, İranla yenilənən əlaqələr və bu ölkənin prezidentinin Bakıya gəlməsi, may ayında Avropaya ardıcıl səfərlər, həmçinin ötən gün baş tutan Laçın zirvəsi, bir sözlə, bütün bunlar Rusiyanın iştirakını istisna edir.

Eyni tendensiya Ermənistan və Gürcüstan üçün də xarakterikdir. Ermənistanın Baş naziri Nikol Paşinyan Qərbə üz tutub, Gürcüstan isə həm Qərblə, həm də Çinlə münasibətlərə önəm verir. Beləliklə, Kremlin regiona təsir imkanları getdikcə azalır və bunun əsas səbəbi Azərbaycanın rolunun artmasıdır.

Globalinfo.az-a danışan politoloq Zeynal Əmrəliyev bildirir ki, Rusiya Cənubi Qafqazda hazırda ciddi çətinliklə üzləşib:

“Əvvəl Azərbaycan-Rusiya münasibətləri rəsmi Bakının “mehriban qonşuluq” siyasəti əsasında qurulurdu. Amma Moskva bu reallığı qəbul etmək istəmədi. 2024-cü ilin dekabrında baş verən təyyarə hadisəsi və Kremlin günahkarları cəzalandırmaması imperial siyasətin davam etdiyini göstərir. Azərbaycan tam müstəqil siyasət yürüdür və heç bir dövlətə bağlı deyil.

Prezident İlham Əliyev Türk dünyasının birləşməsi istiqamətində ardıcıl çalışır. Dövlət başçısı dəfələrlə ölkəmizin yerinin məhz Türk dünyası olduğunu vurğulayıb. Prezidentin apreldə Çinə səfəri ilə Şərqlə yeni səhifə açıldı, Bakı-Pekin münasibətləri inkişaf edir. Eyni zamanda Avropa ölkələri ilə münasibətlərdə də yeni mərhələ başladılıb.

Azərbaycan öz uğurlu yolunda irəliləyir. Cənubi Qafqazda Ermənistan və Gürcüstan da Rusiyadan uzaqlaşır. Paşinyan Qərbə inteqrasiya yolunu seçib, Gürcüstan isə Avropa və Pekinlə əlaqələri genişləndirir. Rusiyanın bölgə ilə bağlı siyasəti tənəzzül dövrünü yaşayır. Azərbaycanın öz torpaqlarını azad etməsi bu dəyişiklikdə əsas rol oynayıb.”