Gürcüstanın Baş naziri İrakli Kobaxidzenin 2028-ci ilin sonuna qədər Avropa İttifaqına üzvlük məsələsini dondurması fikri ilə başlayan etiraz aksiyaları hələ də davam edir.

Paraleldə Ermənistanın Rusiya ilə siyasi və iqtisadi münasibətləri yaxşılaşdırması, iqtisadi dövriyyəni 4-5 dəfə artırması da göz ardı edilmir. Hətta iddia olunur ki, Paşinyan hökuməti Rusiyanı Qərbin sanksiyalarından yayındırmaq üçün gizli şəkildə Moskvaya dəstək verir.

Hazırda Azərbaycanın da Aİ və ABŞ-la münasibətlərdə gərginlik yaşadığı məlumdur. Bütün bunların Cənubi Qafqaz ölkələrinin qapılarını ABŞ və Aİ-nin üzünə bağlayacağına dair iddialar da səsləndirilməkdədir.

Bu, realdırmı?

Globalinfo.az-a danışan politoloq Sultan Zahidov deyib ki, Cənubi Qafqaz qapılarını tam formada ABŞ və Aİ-nin üzünə bağlamayıb:

“Çünki Avropa İttifaqı ilə ticari, iqtisadi əlaqələr Qafqaz üçün vacibdir. Aİ Azərbaycanın xarici siyasətində birinci yerdədir. Ölkəmizin bir çox Avropa ölkələri, İtaliya, Rumıniya, Bolqarıstan və Macarıstanla yüksək strateji münasibətləri var. Azərbaycan Aİ-nin bir neçə ölkəsinə qaz ixrac edir. Münasibətlər hər iki tərəf üçün xüsusi əhəmiyyətə malikdir.
Siyasi məcrada münasibətlərdə müəyyən gərginliklər mövcuddur. Bu da Avropa İttifaqının və bəzi ölkələrin rəsmi Bakıya qarşı qərəzli, ermənipərəst mövqeyi ilə əlaqədardır”.

Politoloqun sözlərinə görə, Gürcüstan Aİ-yə daxil olmaq prosesini müvəqqəti dondurub:

“Son etirazların ardınca Aİ və ABŞ-ın sərt ritorikası Gürcüstanı belə bir addım atmağa məcbur edib. Bu, rəsmi Tbilisinin müəyyən qədər Qərbdən və Avropa İttifaqından uzaqlaşmasıdır.

Ermənistanda isə ticari, iqtisadi əlaqələr yüksələn xətlə inkişaf edir. Bu il Rusiya ilə 14 milyard dollara yaxın ticarət dövriyyəsi olacaq. Siyasi sahədə isə Qərblə münasibətlərə üstünlük verir.

Görünür, Qərb İrəvana yalnız müəyyən şərtlər daxilində dəstək göndərir. Bunlar Ermənistan Baş naziri Nikol Paşinyanın Qərbyönümlü siyasət yürütməsi, Qərbin platformalarında iştirak etmək, Rusiya ilə siyasi və hərbi bağlarını mümkün qədər tez bitirilməsidir. Bunun müəyyən qədər şahidi oluruq. Belə ki, Ermənistan KTMT-dəki fəaliyyətini dondurub. Rus hərbçiləri yavaş-yavaş ərazidən çıxarılır. Siyasi, hərbi sahədə münasibətlərdə problemlərin olması da bundan irəli gəlir.

Lakin ticari, iqtisadi cəhətdən Ermənistan Rusiyadan o qədər asılıdır ki, bunu qısa zamanda qırmaq mümkün deyil. Hətta bu gün İrəvanda Rusiyanın sanskiyalardan yayınmasına şərait yaradan qüvvələr var”.