Prezident İlham Əliyev ADA Universitetində “Yeni dünya nizamına doğru” mövzusunda keçirilən beynəlxalq forumda Ermənistanla münasibətlər, o cümlədən Cənubi Qafqazın inkişafı və beynəlxalq əlaqələrlə bağlı bir sıra vacib mesajlar verib.

Prezident Ermənistanın hərəkətlərinin Cənubi Qafqaz regionuna inkişaf etmək imkanı yaratmadığını, lakin bunun üçün bütün şansın olduğunu deyib. O bildirib ki, Azərbaycan-Gürcüstan münasibətlərinə baxdıqda, enerji təhlükəsizliyi, nəqliyyat, sərmayə, siyasi dialoq – bütün bunların üstünlük gətirdiyini görmək olur. Lakin Ermənistan özünü bunlardan məhrum etdi, işğal və təcavüz nəticəsində o, tranzit ölkəyə çevrilə bilmədi.

Dövlət başçısı həmçinin Azərbaycanın bir çox ölkələrlə strateji tərəfdaşlıq sazişləri imzaladığını vurğulayıb. İlham Əliyev bütün bunların coğrafi, siyasi, iqtisadi və nəqliyyat sahələrində Mərkəzi Asiya regionu və Avropa arasında ümumi yanaşmaları formalaşmağa imkan yaratdığını bildirib. Prezident qeyd edib ki, bəziləri Azərbaycanı ümumiyyətlə prosesdən ayırmaq və Cənubi Qafqazda ayırıcı xətləri çəkmək cəhdi göstərir, lakin bunlar uğursuz olacaq.

Globalinfo.az-a danışan politoloq Fərhad Məmmədov deyib ki, ayırıcı xətləri formalaşdırma cəhdi ötən ilin aprelində baş verdi:

“ABŞ və Avropa İttifaqının (Aİ) Ermənistanla xüsusi bir saziş imzalaması, digər tərəfdən Gürcüstana hazır olmadığı təqdirdə ittifaqa üzvlük namizədliyinin verilməsi buna misal ola bilər. Beləliklə, Cənubi Qafqazı fraqmentləşdirib burada geosiyasi xətləri müəyyən etməklə öz siyasətlərini həyata keçirməyə çalışırdılar.

ABŞ-ın keçmiş prezidenti Co Bayden administrasiyası bu planı xüsusilə icra etmək istəyirdi. Prezident İlham Əliyev də çıxışında dedi ki, Cənubi Qafqazda ayırıcı xətləri çəkmək cəhdi göstərənlər var və biz bunun şahidiyik. Belə bir cəhd Gürcüstanda dəstəklənmədi. Ermənistan isə bir ada kimi formalaşıb. Hər hansı geosiyasi təsirə malik deyil. Ona görə planın baş tutması mümkün olmur”.

Politoloq İlyas Hüseynov isə deyib ki, Azərbaycan Prezidentinin ADA Universitetində ənənəvi olaraq iştirak etdiyi tədbirdə söylədiyi fikirlər geniş maraq doğurur:

“Nəzərə almaq lazımdır ki, bu forumda dünyanın tanınmış analitikləri cənab Prezidentə sual vermək imkanı əldə edirlər. Onun verdiyi cavablar həm regional reallıqlar, həm də Azərbaycanla bağlı təsəvvür formalaşdırır.

Cənab Prezident öz fikirlərində bildirdi ki, Ermənistanın işğalçılıq siyasəti bütün regiona mənfi təsir göstərib. Bu xüsusda Azərbaycan-Gürcüstan münasibətlərinə nəzər yetirsək deyə bilərik ki, nəqliyyat, enerji, sərmayə, qarşılıqlı əməkdaşlıq sahəsində çox yaxşı münasibətlər formalaşıb. Ermənistan işğalçılıq siyasəti aparmasa və etibarlı tərəfdaş olsaydı, bu əməkdaşlığın bir parçası olmaq imkanı qazana bilərdi.

Hazırda Azərbaycan öz ərazilərini işğaldan azad etsə də, İrəvan sülhə maneə təşkil edən və cənab Prezidentin də dəfələrlə vurğuladığı şərtləri icra etmir. Bu da regionda gərginliyi, eskalasiya riskini artırır”.