ABŞ və İsrailin İrana qarşı təzyiqlərinin artması fonunda İraqda Tehrana bağlı şiə milisləri regional qarşıdurmaların əsas mərkəzlərindən birinə çevrilib. Həmin qruplar son zamanlar İsrailə hücumları artırmağa başlayıblar. Bildirilir ki, İŞİD-lə mübarizə məqsədilə formalaşdırılmış bu milis qruplarına Təl-Əvivdən cavab zərbələri endiriləcəyi halda, bölgədə genişmiqyaslı müharibə qaçılmaz ola bilər.

Ekspertlərin fikrincə, İsrailin Suriyada olduğu kimi, indi də İraqda qarşıdurmaları Türkiyə sərhədinə qədər daşıyaraq regionda daha geniş bir xaosun yaranmasına səbəb olması mümkündür. Burada Kürdüstan bölgəsində gərginlik ehtimalına xüsusi diqqət çəkilir.

Globalinfo.az-a danışan Yaxın Şərq üzrə ekspert Kənan Rövşənoğlu bildirib ki, İsrailin İraq Kürdüstanı ilə əlaqələri hələ ötən əsrin 70-ci illərindən mövcuddur:

“Bunu hər kəs, o cümlədən bölgə ölkələri də yaxşı bilir. İran vaxtaşırı Ərbil və ətraf rayonlarda İsrail kəşfiyyat mərkəzlərini hədəfə aldığını elan edir. Lakin Təl-Əvivin İraq mərkəzi hökumətinə ciddi təsir imkanları yoxdur.

Hazırda ABŞ, əsasən, İraq hakimiyyətinə təzyiq göstərərək İrana bağlı silahlı qrupların tərksilah edilməsinə çalışır. Daxildə proses əleyhinə müqavimət hələ də qalır. Lakin bu ayın əvvəlində bir neçə İraq qrupu bəyan etdi ki, dövlətə xarici təzyiqləri azaltmaq məqsədilə silahı yerə qoymağa hazırdırlar.

Ümumiyyətlə, İsrailin Yaxın Şərqdəki fəaliyyəti ərəb ölkələrinə təsir göstərmək məqsədi daşıyır. Təl-Əviv hökuməti bu dövlətləri zəiflətməyə və nəzarət altında saxlamağa çalışır. Ona görə də hər hansı Yaxın Şərq ölkəsində İsrailin varlığı artıq qeyri-adi hal sayılmır.”