Türkiyənin DEM Partiyasının üzvlərindən ibarət heyət bu gün PKK terror qruplaşmasının İmralı həbsxanasında saxlanılan qurucusu Abdullah Öcalana baş çəkəcək.

Globalinfo.az xəbər verir ki, bu barədə Türkiyə mətbuatı məlumat yayıb.

Bunun Öcalanla partiya üzvləri arasında sayca üçüncü görüş olduğu bildirilir. Məlumata görə, görüşdən sonra açıqlama verilməsi üçün Diyarbəkir və Van bölgələrində küçələrə böyük ekranlar qurulub. Bələdiyyələr bu ərazilərdə yaşayanları çıxışı izləmək üçün meydanlara çağırıb.

Partiya üzvlərinin açıqlamasında Öcalanın terror qruplaşmasının üzvlərinə gözlənilən müraciətindən də danışılacağı bildirilir.

“Türkiyə” qəzeti yazır ki, terrorçubaşı A.Öcalan bu 4 mərkəzə PKK-nın fəaliyyətinin bitməsi ilə bağlı çağırış edəcək:

“- İraqdakı Kandil mərkəzinə;

– Suriyadakı PKK-PYG-SDQ qruplaşmasına;

– PKK-nın Avropa qanadına;

– DEM Partiyasına (terror qruplaşmaları ilə əlaqəni kəsmək üçün)”.

Məlumata görə, A.Öcalan bu istiqamətlərə çağırışında terror dövrünün bitdiyini bəyan edəcək və siyasi mübarizəyə keçid alındığını açıqlayacaq.

Bildirilir ki, DEM Partiyası görüşdən sonra saat 17:00-da (Bakı vaxtilə 18:00-da – red.) açıqlama verəcək.