Hindistan Pakistana qorxaqcasına hücum etmək üçün gecənin qaranlığından istifadə elədi, amma Silahlı Qüvvələrimiz ona layiqli cavab verdilər.

Teleqraf xəbər verir ki, bunu Pakistan Baş nazir Şahbaz Şərif parlamentdə çıxışı zamanı deyib.

Baş nazir bildirib ki, Pakistan ordusu düşmən təyyarələrini vurmağa həmişə hazırdır.

“Beş gün əvvəl Hindistan (Fransadan) “Rafale” reaktiv təyyarələri alması ilə öyünürdü və bu təyyarələr orada döyüşə hazır vəziyyətdə uçurdular, amma bizim hava qüvvələrimiz də hazır idi”.

Şahbaz Şərif sürətli və operativ cavaba görə Hərbi Hava Qüvvələrinin rəisi Zahir Babara təşəkkür edib və onu təbrik edib: “Onlar Hindistan təyyarələrini geri çəkilməyə məcbur etdilər”.

Baş nazir əlavə edib ki, 80 Hindistan təyyarəsi ötən gecə Pakistanın altı şəhərini hədəfə alıb, amma ordu bunun qarşısını almağa tam hazır olub.

Şahbaz qeyd edib ki, Pakistan təyyarələri Hindistanın hava məkanına keçməyib və üç “Rafale” də daxil olmaqla beş reaktiv qırıcını vurmağa müvəffəq olub. Onlardan ikisi Kəşmirdə, biri isə Batxindada yerə düşüb.

Baş nazir söyləyib ki, iki pilotsuz təyyarə də vurulub.

“Dünən gecə düşmənlərimiz yata bilmədilər və dostlarımız çətin anlarda kömək üçün Pakistanın yanında olduqlarını bildirdilər. Pakistan üçün bundan daha hörmətəlayiq bir şey yoxdur”, - Baş nazir Şahbaz əlavə edib.

Pakistan lideri ölkəsinin istər nüvə, istərsə də ənənəvi müharibədə Hindistandan üstün olduğunu da vurğulayıb: “İndi onlar Pakistanın kim olduğunu bilirlər”.