"Son günlər dünyanın siyasi gündəliyində Pakistanla Hindistan arasında hərbi gərginliyin artması məsələsi yer alıb. Pakistan Azərbaycan üçün dost, qardaş, strateji müttəfiq ölkədir. Azərbaycanın ərazi bütövlüyünü dəstəkləyən, qardaşlıq münasibətlərini önə çəkən Pakistanla bağlı məsələ bizim üçün önəmlidir".

Bu sözləri Teleqraf-a Milli Məclisin deputatı Aydın Mirzəzadə Pakistanla Hindistan arasındakı gərginliyə münasibət bildirərkən deyib.

Onun fikrincə, Pakistanın qarşılaşdığı məsələ Azərbaycan ictimaiyyətini narahat etməyə bilməz: “Hindistanda baş verən terror hadisəsi iki ölkə arasında münasibətlərin gərginləşməsinə səbəb olub. Terroru törədənlər hələ məlum olmayıb, kimlərin bunu etməkdə əli olduğu müəyyənləşməyib. Bu hallar ortaya çıxmadan Hindistan tərəfi Pakistanı ittiham edir, onunla münasibətləri gərginləşdirir”.

Aydın Mirzəzadə Hindistandan Pakistana gedən su mənbələrinin qarşısının kəsildiyini bildirib: “250 milyon əhalisi olan bir ölkə sudan məhrum edilir. Bu nə insanlığa, nə də ki, beynəlxalq hüquq normalarına sığır. Bununla belə iki ölkə arasında hərbi qarşıdurma təhlükəsi hər gün artır. Azərbaycan tərəfi olaraq biz məsələnin diplomatik yolla həllinin tərəfdarıyıq. Pakistana dözüm, səbr arzulamaqla yanaşı, bu problemdən şərəfini, adını, nüfuzunu qoruyaraq çıxmasını arzulayırıq. Xalq olaraq dostumuz, qardaşımız Pakistanın yanındayıq”.

Qeyd edək ki, aprelin 22-də Kəşmirdə 26 turistin ölümü ilə nəticələnən hücumdan sonra Hindistan və Pakistan arasında gərginlik artıb, sərhəddə atışma başlayıb. Dehli baş verənlərə görə Pakistanda fəaliyyət göstərdiyini iddia etdiyi qruplaşmanı günahlandırıb, İslamabad iddianı rədd edir. Hindistan və Pakistan bundan sonra qarşılıqlı olaraq vətəndaşlarının bir-birinin ərazisindən çıxarılmasını əmr edib, Dehli İslamabadla su mübadiləsi müqaviləsini dayandırdığını açıqlayıb.