“Müharibə olmayacaq, sülh olacaq. Müharibənin baş verməsi üçün heç bir əsas yoxdur”.

Globalinfo.az xəbər verir ki, bunu Ermənistanın Baş naziri Nikol Paşinyan parlamentin aprelin 15-də keçirilən iclasında çıxışı zamanı bildirib.

Paşinyan İrəvanın sülh müqaviləsini imzalamağa hazır olduğunu deyib:

“Ermənistanda və Azərbaycanda fəaliyyət göstərən bütün qüvvələri son dərəcə məsuliyyətli olmağa, bu məntiqə xələl gətirən bəyanatlar verməməyə çağırıram. Biz həmçinin sülh sazişini imzalamağa və eyni anda ATƏT-in Minsk qrupunun ləğv edilməsi üçün müraciət ünvanlamağa hazırıq. Mən dəfələrlə demişəm ki, bu qurumun ləğvi Ermənistan üçün başadüşüləndir. Əgər biz Qarabağ məsələsini birdəfəlik bağlayırıqsa, o zaman bu mövzu ilə məşğul olan qurumun fəaliyyətinin nə mənası var? Lakin biz əmin olmaq istəyirik ki, rəsmi Bakı qurumun buraxılmasını münaqişənin Azərbaycan ərazisində son qoyulmasına və onun suveren Ermənistan ərazisinə keçirilməsinə yönəlmiş addım kimi qiymətləndirmir. Elə bu səbəbdən narahatlıqlarımızı tamamilə aradan qaldırmaq üçün hər iki sənədi eyni anda imzalamağı təklif edirik”.

Qeyd edək ki, daha əvvəl Ermənistanın xarici işlər naziri Ararat Mirzoyan da eyni bəyanatla çıxış edib. O, müqavilə imzalandıqdan sonra 10 dəqiqə ərzində Minsk qrupunun ləğvi üçün də lazımı sənədlərə qol çəkməyə hazır olduqlarını açıqlayıb.