Hər şey 2020-ci ilin bu günlərini xatırladır. Onda da ölkəboyu bir hərəkətlilik vardı. Tovuz döyüşlərindən sonra Ermənistanın təxribatları səngimirdi. Demək olar, hər gün sərhəddə atəşkəs pozulurdu. Azərbaycan hər an hər şeyə hazırlıq olmaq üçün tədbirlər görürdü.

O vaxtkı hazırlıqla indiki arasında bir fərq var: onda qələbə adına ortada heç nə yox idi. Birinci Qarabağ müharibəsi məğlubiyyətlə başa çatmışdı. Xeyli ərazi itirmişdik. Yaxın-uzaq tarixdə istinad ediləsi, ilham alınası zəfər təqviminə rast gəlmək mümkün deyildi.

İndi isə Şuşaya bayraq sancan Ordu, Kəlbəcəri, Ağdamı, Laçını döyüşsüz azad edən Dövlət var. Azərbaycan xalqının inamı özünə qayıdıb. Qorxu, tərəddüd, inamsızlıq gedib, bunların yerini özgüvən tutub.

Sentyabr başlayandan azərbaycanlılar yenidən müharibə moduna köklənib. Tezliklə hərbi əməliyyatların başlayacağı haqda söz-söhbət dolaşır. Xalq mənəvi-psixoloji baxımdan növbəti savaşa hazırdır. Cəmiyyət 30 ildən çoxdur davam edən münaqişənin son verməsini istəyir. Ermənilərin hər fürsətdə təxribat törədib, bizi hərbi toqquşmalara cəlb edə bilməsi insanlarımızı bezdirib. Azərbaycanda separatizmin kökünün birdəfəlik kəsilməli olduğunu hamı anlayır. Bunun yolunun hərbi əməliyyatlardan keçdiyini hər kəs yaxşı bilir.

Ermənistan indi də təxribatdan əl çəkmir. Hər gün atəşkəsi pozur. Kəlbəcərdən Naxçıvana, Şuşadan Laçına kimi sərhəddə düşmən mövqelərimizi atəşə tutur.

Azərbaycan tarixi ərazilərini işğaldan azad etməlidir. Əslində şahid olduğumuz hadisələr, proseslər dövlətçiliyimizin bərpası istiqamətində atılan addımlardır. Tarixi günlərdən keçirik…

Bu arada, məlumatlar yayılır ki, İran Azərbaycana hücum etmək üçün ordusuna “hazır ol!” əmri verib. Bu iddia ilə Ankaradakı Rusiya Araşdırmaları İnstitutu çıxış edib.

Məlumata görə, Azərbaycanın İranla sərhəd yaxınlığında Ermənistan ərazisinə hər hansı müdaxiləsi nəticəsində ölkənin şimal-qərbində yerləşən ordu birliklərinə hücuma hazır olmaqla bağlı əmr verilib.

Qeyd edək ki, sentyabrın 7-si gecə saatlarında İranın “Şahid 171” dronlarının Azərbaycan-Ermənistan şərti sərhədində kəşfiyyat uçuşu keçirməsinə dair məlumatlar yayılmışdı.

Bu məlumatın nə dərəcədə doğru olub-olmadığı barədə hələlik bir söz demək çətindir. İrandan hər zaman pislik və namərdlik görmüşük deyə, bu tip xəbərlərə dərhal inanırıq. Son 1 ildə İranla Azərbaycan arasındakı gərgin münasibətlər hələ tam aradan qalxmayıb.

Zakir Həsənov İran hərbi nümayəndə heyətini qəbul edib

Amma son vaxtlar İran-Azərbaycan münasibətlərində bir ilıqlığın şahidi olmaqdayıq. Bunu rəsmi şəxslərin dilindən eşidirik. Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev İsrailin beynəlxalq “i24NEWS” telekanalına müsahibəsində deyib ki, Azərbaycan iki ölkə arasında münasibətlərin normallaşması məsələsində İran tərəfdən müsbət ismarışlar alır.

Sentyabrın 9-da Bakıda Azərbaycan-İran Birgə Komissiyanın iclası keçirilib. Müdafiə naziri Zakir Həsənov tədbirdə iştirak etmək məqsədilə ölkəmizdə səfərdə olan general-mayor Məhəmməd Əhədinin rəhbərlik etdiyi İran İslam Respublikasının Silahlı Qüvvələrinin nümayəndə heyətini qəbul edib. Bu ziddiyyətli xəbər axınında nəyin doğru, nəyin yanlış olduğunu çox keçməz, bilərik.

Azərbaycan ərazi bütövlüyünü tam bərpa etməsə, regionda dayanıqlı sülhə nail olmaq mümkün görünmür. Hədəf Zəngəzurdur – Quzey Azərbaycanın bərpası. Bu anlayışa tarixi torpaqlarımızın işğaldan azad edilməsi daxildir. Artıq Azərbaycan əsgərinin çəkmələrinin səsi Göyçə dağlarından gəlir. O çəkmələr Zəngəzur torpaqlarına basılır. Kəlbəcərdə, Laçında, Zəngilanda, Qubadlıda – Ermənistanla və İranla kritik sərhəd bölgələrində qərarlaşmışıq.

Burda həm də yeni dünyanın xəritəsinin konturları çəkilir. Təzə düzən qurulur. Böyük geopolitik inteqrasiya proseslərinə start verilib. Yeni dünya düzənində Şərqin aktuallığı ortaya çıxır. Böyük qlobal oyunçular artıq bu prosesdə xeyli məsafə qət ediblər. Azərbaycanın şimal hissəsinin bütövləşməsi, tarixi ərazilərin bərpa edilməsi, Güney Qafqazda sülhün, əmin-amanlığın olması həm də regional və qlobal oyunçulara lazımdır. Bu tarixi şansdan üç il öncə yararlandıq. Yenə bizim üçün gözəl imkanlar açılıb. Yarımçıq qalan işi tamamlamalıyıq. Tamamlayacağıq…