“Kyiv Independent” Rusiya hökumətinin qəbul etdiyi yeni səfərbərlik qanununun NATO ilə toqquşmaya hazırlıq olduğunu yazıb. Dəyişikliyə əsasən, səfərbərlik, hərbi vəziyyət və müharibə anlayışları birbaşa Rusiya qanunvericiliyinə daxil edilib.

Analitiklərin fikrincə, bu qərarlar Rusiyanın həqiqətən də uzunmüddətli müharibəyə, hətta alyansla qarşıdurmaya hazırlaşdığını təsdiqləyir. Son zamanlarda Rusiya sərhədlərində müşahidə olunan gərginlik, Gürcüstanda NATO təlimlərinin keçirilməsi, ABŞ rəsmilərinin bəyanatları və s. kimi amillər iddiaları daha da gücləndirir.

Rusiya NATO ilə müharibə aparmaq imkanına malikdirmi? Belə bir toqquşma yaxın gələcəkdə nə dərəcə real görünür?

Globalinfo.az-a danışan Siyasi və Hüquqi Araşdırmalar Mərkəzinin sədri, politoloq Xəyal Bəşirov bildirib ki, Rusiya rəsmilərinin son bəyanatlarından da göründüyü kimi, Kreml ABŞ-ın verdiyi 10 günlük möhlətə loyal yanaşmaq istəmir:

“Rusiya açıq şəkildə “xüsusi əməliyyat” adlandırdıqları, əslində isə Ukraynanın böyük hissəsinin ilhaqı ilə nəticələnən müharibəni davam etdirmək niyyətindədir. ABŞ-da Prezident Donald Tramp hakimiyyətə gəldikdən sonra Ağ Ev ilə Avropa arasında ciddi fikir ayrılıqları müşahidə olundu. O, İkinci Dünya müharibəsindən sonra Avropaya verilmiş təhlükəsizlik zəmanətlərinin artıq Vaşinqton tərəfindən davam etdirilməyəcəyini bildirdi. Bu isə Avropaya mesaj idi ki, Rusiya-Ukrayna müharibəsi fonunda silahlanmalı, müdafiə qabiliyyətini artırmalı və NATO daxilində hərbi büdcələrini gücləndirməlidirlər.

ABŞ indiyədək yürütdüyü siyasətə tənqidi yanaşaraq Avropa ölkələrinə açıq şəkildə Rusiyanın onları da istədiyi an hədəf ala biləcəyini göstərdi. Ukraynanın tam ilhaqı isə növbəti mərhələdə digər Avropa ölkələrinin də eyni aqibətlə üzləşməsi ilə nəticələnə bilər. Moskva bəyan edir ki, NATO-nun Şərqə doğru genişlənməsi qeyri-legitimdir. Çünki Kreml həmin əraziləri özünün legitim hədəfi hesab edir. Qərb liderləri və siyasətçiləri bu açıqlamaları diqqətlə izləyir, paralel olaraq müzakirə aparırlar. Avropa gələcək təhlükələrə qarşı hazır olmalı və hərbi potensialını gücləndirməlidir”.

Politoloqun sözlərinə görə, Qərbin Ukraynaya göstərdiyi üç il yarımlıq hərbi və maliyyə dəstəyi çərçivəsində ən böyük çatışmazlıq canlı qüvvədir:

“NATO ölkələri Ukraynaya silah, maliyyə, texnika və siyasi dəstək göstərir. Rusiyaya qarşı tətbiq olunan sanksiyalar, iqtisadi təcrid siyasəti və sairə də bu prosesə daxildir. Lakin Ukrayna bu gün canlı qüvvə baxımından ciddi çətinliklərlə üz-üzədir. Artıq 60 yaşdan yuxarı şəxslər də orduya cəlb olunur.

Rusiya da oxşar problemlərlə üzləşsə də, maddi resursları hesabına muzdlu əsgərlər cəlb edə bilir. Hətta Şimali Koreyadan gətirilən hərbçilər prosesin bir hissəsidir. Bundan əlavə, Rusiyada kifayət qədər miqrant var və onların hərbi əməliyyatlarda iştirakı üçün qanunvericilikdə dəyişiklik edilib. Kiyevin isə belə imkanları yoxdur. Müharibənin hələ ilk günlərində 15-20 min insanın ölkəni tərk etdiyi məlum olmuşdu”.

Xəyal Bəşirov vurğulayıb ki, Rusiya uzunmüddətli müharibəyə hazırlaşır:

“Ölkə daxilində ictimai rəyə təsir göstərilir, insanlar psixoloji cəhətdən müharibəyə hazırlanır. Bu proses uğurla davam etdirilir. Rusiya vətəndaşları arasında aparılan sorğular göstərir ki, əhali ölkə rəhbərliyinin siyasətini dəstəkləyir. Mövcud gedişat müharibənin hələ uzun müddət davam edəcəyini göstərir. Bu reallığı nəzərə alan Donald Tramp da gülünc vəziyyətə düşməmək üçün 50 günlük möhlətin əhəmiyyətsiz olduğunu anladı və bu müddəti daha da qısaltdı”.