Rusiya-Ukrayna müharibəsində vəziyyət çıxılmaz hal almağa başlayıb. Belə ki, ABŞ hər vəchlə iki ölkə arasında sülhün əldə edilməsinə çalışır. Bu istiqamətdə artıq fəaliyyətə başlayıb. Ukraynaya göndərilən yardımlara qoyulan məhdudiyyətlər, ABŞ Prezidenti Donald Trampın Rusiya lideri ilə danışıqlar aparması, Vaşinqton və Moskva münasibətlərinin normallaşması və s. buna nümunədir.

Ukrayna isə öz növbəsində təslim olmaq niyyətində deyil. Avropadan gələcək yardımlar hesabına müharibəni öz şərtləri daxilində sülhün əldə edilməsinə qədər uzatmaqda maraqlı görünür.

Bir çox ekspertlər isə rəsmi Kiyevin sözügedən addımlarını “son çırpınış” kimi qiymətləndirir. Hətta bu proseslər kontekstində Zelenskinin hakimiyyətdən gedəcəyi də gözlənilir.

Tramp-Putin danışığı Ukraynanı və onun hakim komandasını, prezidentini bitirdi?

Globalinfo.az-a danışan politoloq Samir Hümbətov deyib ki, Ukrayna Prezidenti Volodimir Zelenskinin taleyinin həll olunduğunu söyləmək tezdir:

“Rusiya və Ukrayna arasında qarşılıqlı razılaşmanın, iki tərəfin, eləcə də ABŞ-ın tələblərinin nə olacağı hələ dəqiqləşməyib. Müharibənin dayandırılması ilə bağlı şifahi razılıq əldə olunub. 1 aylıq atəşkəsə əməl olunub-olunmayacağı da sual altındadır. Ukraynanın hazırda özünü toparlayıb Rusiyaya qarşı ciddi müqavimət göstərməyə başladığı görünür. Belə olan halda Ukraynanın Rusiya qarşısından geri çəkiləcəyini düşünmək tezdir.

Müharibənin taleyi Avropadan da asılıdır. Çünki Avropa da öz sözünü deməlidir. Ukrayna və Böyük Britaniya arasında təhlükəsizlik anlaşması imzalanıb. Avropa ölkələri Ukraynaya dəstək göstərəcəkləri ilə bağlı açıqlama veriblər. Bu işdə tələsmək olmaz. Hazırda ilkin razılaşmaya görə, tərəflər silahları yerə qoyub danışıqlara başlamalıdırlar.

Rusiya razılaşmaya əməl etməsə müharibə daha gərgin fazaya keçəcək. ABŞ 1 aylıq atəşkəsdən sonra sülh danışıqları üçün şəraitin yaranmasını istəyir. Lakin bu hələ mümkün görünmür”.