Ukrayna və Amerika Birləşmiş Ştatları arasında mədən hasilatı üzrə çərçivə sazişi imzalanmağa hazırdır.

Publika.az xəbər verir ki, bu sözləri ABŞ-ın maliyyə naziri Skott Bessent "Fox Business" telekanalına açıqlamasında deyib.

O qeyd edib ki, təkcə ABŞ prezidenti Donald Tramp və Ukrayna prezidenti Vladimir Zelenskinin imzaları qalıb. Sənəd fevralın 28-də imzalanmalıdır.

"Müqavilə tamamlanıb, kağız üzərindədir və Ukrayna hökuməti bunu təsdiqləyib. Fevralın 28-də dövlət başçılarının onu imzalaması gözlənilir. Bu, faydalı qazıntılar, neft, qaz və infrastruktur aktivləri ilə bağlı sazişdir", - Bessent bildirib.

Amerikalı nazirin sözlərinə görə, bu saziş həqiqətən də qarşılıqlı faydalıdır, çünki o, Ukrayna xalqını və Amerika biznes ictimaiyyətini bir-birinə daha da yaxınlaşdırır.

Qeyd edək ki, fevralın 28-də Vladimir Zelenskinin Trampın komandası ilə danışıqlar aparmaq üçün Vaşinqtona getməsi planlaşdırılır. Orada tərəflər mineral ehtiyatlarla bağlı müqavilə imzalamalıdırlar.

Daha əvvəl “Financial Times” Ukrayna və Amerika Birləşmiş Ştatlarının mineral ehtiyatlar sazişinin detalları barədə razılığa gəldiyini yazmışdı. Qeyd olunub ki, Vaşinqton resurs inkişafından əldə edilən potensial gəlirlə bağlı 500 milyard dollar iddialarından əl çəkib. Müqavilə Ukraynanın dövlət mineral ehtiyatlarının “gələcək monetizasiyasından” əldə olunan gəlirin 50 faizini daxil edəcəyi fondun yaradılmasını nəzərdə tutur. Eyni zamanda, çərçivə sazişində təhlükəsizlik təminatlarından bəhs edilmir.