ABŞ Prezidenti Donald Trampın Ağ Evdə Ukrayna Prezidenti Volodimir Zelenski ilə mübahisəsi, daha sonra Kiyevə yardımın dayandırılması ilə bağlı qərarı birmənalı qarşılanmır. Trampın Ukrayna hökumətini həm mineral ehtiyatlarla bağlı sazişi imzalamağa, həm də Rusiya ilə sülh danışıqlarına başlamağa məcbur etməsi diqqət çəkir. Ağ Ev rəhbərinin bu addımları Moskvanın maraqlarının təmin olunması kimi dəyərləndirilir.

Beynəlxalq siyasi dairələrdə Rusiyanın müttəfiqlərini dəstəkləməsinə baxmayaraq, ABŞ-ın ondan fərqli olaraq düşmənlərinə də, dostlarına da eyni şəkildə davrandığı bildirilir. Yəni Vaşinqton maraqları təmin edildikdən sonra düşməni ilə dost ola, yaxud dostunu düşməninə qurban verə bilir. Moskvanın Suriyada Bəşər Əsəd rejiminin devrilməsinə baxmayaraq, onu hələ də müdafiə etməsi nümunə göstərilir.

Globalinfo.az-a danışan politoloq Qabil Hüseynli deyib ki, Rusiya keçmiş müttəfiqlərinə qarşı aqressiv tutum sərgilədiyi üçün MDB məkanında nüfuzu zədələnib:

“2008-ci ildə Gürcüstanla müharibə, Ukrayna savaşı, Azərbaycan və Ermənistanla son gərginliklər bu ölkəyə inamı azaldıb. ABŞ Ukrayna məsələsində mövqeyini dəyişsə də, bunun iddia edildiyi kimi ölkələri Rusiyaya yaxınlaşdırması çətin görünür. Bir hegemon gücün yanlışları digərinin yol verdiyi səhvlər doğru etmir.

Fikrimcə, Ukraynanın başına gələnlər bir reallığı ortaya çıxarır. Bu illər ərzində ən doğru xarici siyasəti Azərbaycan yeridib. Balans siyasəti geosiyasi qarşıdurmada ən uyğun seçimdir. Nə ABŞ, nə də Rusiya yaxşıdır. Bu, betərin-betəri söhbətidir. Biri daha az pisdir deyə digəri yaxşı sayılmır.

Ukrayna üçün seçim şansı yox idi. İşğala məruz qalan ölkə hər cür yardıma açıqdır. Amma çarəsizlikdən istifadə həqiqətən də pisdir. ABŞ Ukraynanın məğlub olacağını bilib qalibin yanında dayanmaq istədi. Amma bu, beynəlxalq münasibətlərdə ciddi dönüşə səbəb olacaq. Qarşıdakı illərdə daha ciddi müharibələrə şahidlik edəcəyik”.

Politoloq Fərhad Məmmədov isə bildirib ki, Tramp administrasiyasını prestijin azalması, ya da artması narahat etmir:

“Donald Tramp ABŞ vətəndaşlarının rifahını düşünür. Aydın məsələdir ki, Vaşinqton üçün əsas olan ölkənin ali maraqlarıdır. Ağ Ev və ölkəyə rəhbərlik edən prezidentlər buna uyğun yol izləyirlər.

ABŞ xarici siyasətində yeniliklər edir. Hazırda bu, əsasən müttəfiqləri ilə bağlıdır. Vaşinqton daha müttəfiqləri üçün döyüşmək yox, yanında ona fayda verəcək, yardım edəcək tərəfdaşlar görmək istəyir.

Təbii ki, bu proses itkisiz olmayacaq. Yəni ənənəvi ittifaqlar dağıla, yeni ittifaqlar qurula bilər. Artıq Avropada proses başlayıb. Rusiya bu məsələlərdə klassik yanaşma sərgiləyir, ABŞ isə dəyişimə meyillidir. Yeni dövrdə köhnə reallıq ilə hərəkət etmək olmaz. Ağ Ev Kremldən fərqli olaraq müttəfiqlərini də dəyişə bilər”.