ABŞ-ın sərhəd və gömrük nəzarəti üzrə mütəxəssislərdən ibarət “missiyanın” Ermənistana gəlişi ləngiyir. Yanvar ayında ABŞ-ın o zamankı dövlət katibi Entoni Blinken “missiya”nın yaxın həftələrdə Ermənistana gedəcəyini desə də, proses ölü nöqtədən tərpənmir. İddia edilir ki, bundan sonra Vaşinqton İrəvanla münasibətlərində Rusiyanın əleyhinə addım atmayacaq.

Bu ləngimənin səbəbi nədir? Ermənistan yenidən Rusiya ilə münasibətləri normallaşdırmağı hədəfləyir?

Globalinfo.az-a danışan deputat Azər Allahverənov deyib ki, erməni mediasında müəyyən texniki problemlər səbəbindən ləngimələrin olduğu bildirilir:

“Görünən odur ki, ABŞ-ın Cənubi Qafqaz, xüsusilə də Ermənistanla bağlı siyasətində dəyişikliklər var. Vaxtilə Ermənistan ABŞ üçün çətir funksiyasını yerinə yetirirdi. Respublikaçıların hakimiyyətə gəlişi hər şeyi dəyişdi. Missiyanın göndərilməməsinin səbəbi də buna görədir. ABŞ maliyyə baxımından Ermənistana böyük dəstək göstərsə də, son məlumatlara görə, bu da dayandırılıb. Artıq rəsmi İrəvan 44 günlük müharibədən sonra yürütdüyü Rusiyadan uzaqlaşmaq siyasətini yenidən nəzərdən keçirməyə məcbur olub”.

Deputatın sözlərinə görə, hazırda dinamik dəyişən geosiyasi vəziyyət yaranıb:

“Ermənistan və Rusiya müttəfiqlik əlaqələrini qoruyub saxlasalar da, münasibətlərdə gərginlik var. İki ölkə lideri arasında verbal polemikanın da şahidi oluruq. Rusiya Xarici İşlər Nazirliyi səviyyəsində dilə gətirilən yanaşmalardan biri də budur ki, İrəvan Moskva üçün təbii strateji tərəfdaşdır. İki ölkə arasında iqtisadi əməkdaşlıq da kifayət qədər genişdir. Ermənistanın ticarət dövriyyəsinin 30 faizi Rusiyanın payına düşür. Ümumiyyətlə, onların təhlükəsizlik məsələlərində Moskvadan gözləntiləri var”.