Rusiyalı politoloq Stanislav Tarasovun son açıqlaması maraqla qarşılanıb. Belə ki, o, ABŞ Prezidenti Donald Trampın Avropa və bəzi postsovet ölkələrində hakimiyyət çevrilişi edəcəyini bildirib. Bu yolda ABŞ-la bərabər Rusiyanın da aktiv rol alacağı istisna edilməyib.

Globalinfo.az-a danışan Siyasi və Hüquqi Araşdırmalar Mərkəzinin sədri, politoloq Xəyal Bəşirov deyib ki, yeni siyasi düzənin formalaşmasına qarşı olan bəzi dövlətlər və onların prosesdə yer almaması səbəbindən hakimiyyətlərinin itiriləcəyi ilə bağlı fikrilər səsləndirilir:

“Qlobal proseslərdə söz sahiblərindən biri olan ABŞ-ın strategiyasına nəzər salsaq görərik ki, o daha çox söz və güc sahibi olan tərəflərə münasibətdə addımlar atır. Məsələn, Avropada hakimiyyət dəyişikliyi çətin bir proses deyil. Emmanuel Makron administrasiyası ikinci dəfə seçilib və növbəti mərhələdə hakimiyyətdən gedəcək. Onun hakimiyyətdən getməsi Donald Tramp administrasiyasının maraqlarına uyğundur. Makronun şəxsi imici, yürütdüyü siyasət ABŞ-la yanaşı Avropanın bir çox dövlətləri tərəfindən qəbul edilmir. Avropada sistemli çevrilişlərin olacağını söyləmək doğru olmaz”.

Politoloqun sözlərinə görə, hazırda gedən proseslərə postsovet dövlətləri heç bir maneə yaratmayacaq:

“Ukraynanın vəziyyəti məlumdur. Belarusda Aleksandr Lukaşenko Rusiya rəhbərliyinin mövqeyindən çıxış edir. Mərkəzi Asiya dövlətlərində də qlobal səviyyədə baş verən proseslərlə bağlı çevrilişin olacağını gözləmirəm. Azərbaycanla Qərbin, ABŞ-ın münasibətlərində hər hansı problemlər yoxdur. Ümumiyyətlə, siyasi prosesləri dəqiq proqnozlaşdırmaq mümkün deyil. Hər an hər şey baş verə bilər”.

Xəyal Bəşirov vurğulayıb ki, gələcəkdə dünyanın yenidən formalaşdırılmasına mane olan dövlətlərlə bağlı addımlar atıla bilər:

“O ölkələrdə hakimiyyət çevrilişi istisna edilməyəcək. Hazırda çox həssas bir dönəmdəyik. Üçüncü Dünya müharibəsinin başlayacağına dair fikirlər səsləndirilir”.